Тимур Турлов: Қазақстанның ең үлкен байлығы оның жастары

Фото: Ашық дереккөз

Кәсіпкер елімізде жастар санының көп болуы жаңа технологияларды меңгеруге және қоғам белсенділігін арттыруға оң ықпал ететіндігін атап өтті.  

«Қазақстан – жас мемлекет. Мұнда адамдар ерте отбасын құрып, көпбалалы болуға ұмтылады. Қазіргі таңда мұндай үрдіс әлемнің ең дамыған елдерінде де, әл-ауқаты жоғары мемлекеттерде де сирек кездеседі. Бұл – біздің басты артықшылықтарымыздың бірі. Себебі жастардың көп болуы – өзгеріске ұмтылыс, кәсіп бастауға деген ынта, жаңа мамандықтар игеру көрсеткішінің жоғары екенін көрсетеді», деді кәсіпкер.

Сондай-ақ Тимур Турлов Қазақстанның экономикалық көрсеткіштеріне тоқталды. Оның айтуынша, бүгінде Қазақстанда сатып алу қабілетінің паритеті бойынша жан басына шаққандағы жалпы ішкі өнім көлемі Түркия, Грекия және Қытайдан жоғары деңгейде қалыптасып отыр.

«Біз – технологияға сенетін әрі кәсіпкерлік рухы мықты ұлтпыз. Біз жауапкершілік алудан және тәуекелге барудан қорықпаймыз. Үлкен мақсаттарға ұмтыламыз және азға қанағат етпейміз. Қиындықтарды еңсеріп, жаңа жол салуға дайын халықпыз», деді Турлов.

Тимур Турлов «Транстелеком» акцияларын сатып алады

Кәсіпкер Қазақстанда технологиялық кәсіпкерліктің қарқынды дамып жатқанын айтып, елдегі ашық мүмкіндіктер мен еркін бәсекелестік жаңа идеялардың жүзеге асуына жол ашатынын жеткізді.

Еске сала кетейік, Тимур Турлов былтыр қарағандылық «Шахтёр» футбол клубын сатып алған болатын.