ТМД терроризм және экстремизммен күресу жөніндегі ынтымақтастық бағдарламасын қабылдады

Бағдарламаның мақсаты – мемлекеттердің, жарғылық органдардың және ТМД-ның салалық ынтымақтастық органдарының осы саладағы ауызбіршілігін одан әрі жетілдіру. Бұл іс-шараларға терроризм мен экстремизмге қарсы күресте халықаралық-құқықтық базаны дамыту және ынтымақтастықты нығайту, террористік және экстремистік қылмыстардың алдын алуға, анықтауға, күресуге және тергеуге бағытталған бірлескен іс-шараларды дайындау және өткізу кіреді. Сондай-ақ ТМД-ға қатысушы мемлекеттердің осы саладағы қызметін ақпараттық, талдамалық және ғылыми қамтамасыз ету, құзыретті органдардың кадрлық әлеуетін дамыту да жатады. 

Ақпараттық қамтамасыз етуді күшейту үшін Терроризмге қарсы орталықтың Мамандандырылған деректер базасын дамыту және талдамалық материалдармен алмасуды кеңейту жоспарланды. Терроризм мен экстремизмге қарсы іс-қимылдың өзекті мәселелері бойынша ғылыми-зерттеу және ұйымдастырушылық іс-шаралар жалғасады, білім беру және кадрларды дамытудың кешенді бағдарламасын әзірлеу басталады. 

Бұл шаралар ТМД елдерінде терроризм мен экстремизмге қарсы күрестің тиімділігін арттыруға және аймақтық қауіпсіздікті қамтамасыз етуге бағытталған. 

Бұған дейін Қазақстан президенті Қасым-Жомарт Тоқаев ТМД Мемлекет басшылары кеңесінің отырысында ТМД аясында Креативті индустрия қауымдастығын құру бастамасын көтергенін жазғанбыз.