​ Төбелеске араша түсемін деп, басынан соққы алды : Адвокаттар Әсет Матаев туралы

«ҚазТАГ»-тың бас директоры Әсет Матаев төбелесіп жатқандарды арашаламақ болған кезде басынан монтировкамен соққы алған. Бұл туралы оның адвокаттары Рена Керимова мен Елена Жигаленок мәлімдеді, деп хабарлайды ҚазТАГ.

Қорғаушылардың айтуынша, бұл істе Матаев күдікті емес, жәбірленуші болып отыр.

«Ол төбелесіп жатқандарды арашалап жүргенде, басынан монтировкамен соққы алған», — дейді адвокаттар.

Осыған қарамастан, журналист екі ай мерзімге қамауға алынды.

Бұған дейін Рена Керимова оқиғаның мән-жайын айтқан болатын. Оның сөзінше, жанжал Матаевтың досы қараңғыда жас жігіттердің бірін қызбен шатастырып алғаннан кейін басталған.

Сондай-ақ, адвокат Әсет Матаевқа қатысты ҚР Қылмыстық кодексінің 274-бабы ("Көрінеу жалған ақпарат тарату") бойынша қылмыстық қудалау тоқтатылғанын атап өтті.

Бұған дейін Алматыдағы оқиға салдарынан «ҚазТАГ» басшысының ауыр жарақат алғаны хабарланған еді. Оған бастың басы жарылған, басында ашық жара бар, маңдай қуысының сол жақ алдыңғы және төменгі қабырғасы сынған, гемосинус, маңдай тұсының сол жағының жарақаты диагноздары қойылған.

Бүгін, 16:34