Тобыл бойындағы тазалық акциясы

Egemen.KZ парақшасынан алынған деректерге сүйене отырып, Qazaq24.com хабарлама жасады..

Өңірде «Таза Қазақстан» бағдарламасы аясында көктемгі жаппай сенбіліктер маусымы басталды. Қостанайдағы «Триатлон» саябағында өткен алғашқы сенбілікке облыс әкімі Құмар Ақсақалов қатысты.

100-ге жуық саябақ пайда болды

Осыдан екі жыл бұрын алапат су тасқыны кезінде Тобыл жағасындағы бұл алапты топан сумен бірге ағып келген жұлынған тал-терек, қираған ағаш, қамыс, шөп-шалам басып қалған еді. Қысқа уақыт ішінде жағалау тау болып үйіліп қалған қоқыс пен қайраңнан аршылып, қала тұрғындары демалатын ғажайып саябаққа айналды.

Жаппай сенбілікке қала тұрғындары, мемлекеттік қызметшілер, ерікті жастар ұйымдарының жасақтары шыққан. Облыс әкімі бас болып көпшілік жұмысқа жұмыла кірісіп, саябақ аумағын күзгі жапырақтан, қураған ағаштан тазартып, әп-сәтте айнадай қылып тазартып тастады. Қыз-келіншектер ағаш әктеп, ер азаматтар қап-қап қоқысты көлікке тиеп жатқанда бір сәттік үзіліс жарияланып, жұмыс басында жүрген қала, басқарма басшылары қала тұрғындарына «Таза Қазақтан» бағдарламасы аясында атқарылған іс-шаралардың жай-жапсарын баяндап, алда атқарылатын жұмыстардың жөн-жосығын айтып берді.

Аталған бағдарлама аясында өңірде кейінгі үш жыл ішінде 94 саябақ, 400-ден астам балалар мен спортсүйер көпшілікке арналған алаң салынған. Алда атқарылар шаруа бұдан да ауқымды. Биыл облыста 77 мың көшет егу, 37 көпқабатты тұрғын үйді қалпына келтіру жоспарланып отыр.

Облыстық энергетика басқармасы басшысының орынбасары Азамат Сабыржанның айтуынша, «Таза Қазақстан» республикалық экологиялық бағдарламасы аясында елді мекендерді абаттандыруға, өңірдің экологиялық жағдайын жақсартуға 54 млрд теңге қаржы жұмсалған.

«Сондай-ақ «Таза Қазақстан» бағдарламасы аясында өңірде 200-ден аса көпқабатты тұрғын үй жөндеуден өтті. Мыңнан астам ескі ғимараттар сүріліп, 39 мыңнан астам жарық шамдары орнатылды. 2023 жылдан бастап көшелерді жарықтандыру деңгейі 82%-дан 94%-ға дейін өсті. Елді мекендерді көгалдандыру дәстүрге айналды. Өңірді көгалдандыру жоспарына сәйкес, 374 мың жасыл желек отырғызылды. 2025 жылы 143,9 мың көшет отырғызылды», деді басқарма басшысы.

Қала әкімі Марат Жүндібаевтың айтуынша, өткен жылы Қостанайдағы КЖБИ шағын ауданы мен орталық саябақта 4 гектар аумақ толықтай абаттандырылған. Қала тұрғындары демалатын саябақтарда көптеген велосипед жолдары, жаяу жүргіншілерге арналған серуен жолдары салынған.

«Саябақтардың аумағына тартан жабындысының көптеп төселуі, әсіресе, қарт кісілердің демалуына қолайлы жағдай туғызып отыр. Қаладағы демалыс алаңдарында дене шынықтырумен айналысып жүрген тұрғындар көбейді. Ал «Триатлон» саябағы су тасқынынан кейін толық жарықтандырылып, суару жүйесі тартылды. Санитарлық тораптар, тренажерлар орнатылып, балалардың ойын алаңдары, автотұрақ салынды. Ең бастысы, Қайырбеков көшесі мен Абай көшелерінің арасы жаяу жүргіншілерге ыңғайлы етіп байланыстырылды. Темірбаев көшесіндегі 0,7 гектар алаң да абаттандырылып, теміржол вокзалы маңындағы тұрғындар игілігін көріп жатыр. Арыстанбеков көшесіндегі ашық аумақта да балалар ойнайтын, тұрғындар спортпен шұғылданатын алаң пайда болды. Айналасына ағаш отырғызылып, зейнеткерлер отырып демалатын шағын саябақ салынды», деді қала әкімі.

Орман алқабындағы экопарк

Қостанай ауданының әкімі Олжас Нұрғалиев Тобыл қаласындағы «Астана» шағын ауданының маңындағы орман алқабында бұрын-соңды болмаған ғажайып экопарк салынатынын айтты. Экологиялық саябақтың аумағы 43 гектар болады.

«Жобаға сәйкес, қазір автотұрақ салынып жатыр. Келушілер арнайы сәнді арка арқылы өтіп, ересектер мен балаларға арналған ойын-сауық аймағына кіреді. Мұнда балаларға арналған шағын сәулет нысандары, тренажерлар, демалыс орындықтары болады. Орман ішінде ұзындығы 2,5 шақырымнан асатын жарықтандырылған велосипед және жүгіру жолдары салынады. Тұрғындарға арналған спорт алаңдары пайда болады. Көпфункционалды футбол алаңы, баскетбол және волейбол алаңдары қарастырылған. Бұл парктің бас-ты ерекшелігі – қалың орманның арасында, тұмса табиғат аясында орналасқан. Саябақтың қақпасына кірген соң, небәрі 5 минут жаяу жүрген адам өзін қала сыртында жүргендей сезінеді», деді Тобыл қаласының әкімі.

Тобыл өзенінің арғы бетіндегі «Астана» шағын ауданына тиіп тұрған экопарк Қостанай қаласының тұрғындары үшін де қолайлы. Қостанайдан көлікпен шыққан адам бұл жерге 10-ақ минутта жетіп барады. Парк аумағында жерүсті, жерасты өткелдерін салу қарастырылған.

Облыс әкімі Құмар Ақсақалов аталған саябақ Мемлекет басшысының тапсырмасы бойынша салынып жатқанын айтты.

«Өткен жылы Президент Қасым-Жомарт Тоқаев облыс орталықтарының маңында экопарк болу керек деген тапсырма берген болатын. Бұл жоба Мичурин ауылының маңындағы орман алқабында жүзеге асырылады. Жергілікті бюджеттен арнайы қаржы қарастырылып отыр. Жоба аясында велосипед жолдары, жаяу жүргіншілер аймағы, жарықтандыру, суару жүйесі, спорт алаңдары салынады. Яғни табиғи орман атмосферасы сақтала отырып, заманауи демалыс орны пайда болады. Бұл экопарк облыс тұрғындарының сүйікті демалыс орындарының біріне айналады деп сенемін. Ерекше жоба екені рас, сондықтан жоспарланған шаруаны өз мерзімінде сапалы атқарып шығу қажет», деді Құмар Ақсақалов.

Биыл өңірде «Таза Қазақстан» бағдарламасын іске асыру аясында көпшілік орындарды халыққа қолайлы етуге, саябақтар мен демалыс алаңдарын абаттандыруға, тұрғын үйлерді жөндеуге, спорт алаңдарын салуға 16 млрд теңгеден аса қаражат қарастырылған. Сонымен қатар елді мекендерді көгалдандыру жұмысы да ауқымын кеңейте түспек. Жыл соңына дейін ауылдық, қалалық мекендерде 77,3 мың ағаш егу жоспарланып отыр.

Қостанай облысы

Соңғы жаңалықтар