Төрт елдің 300 ге жуық жас педагогтің басын қосқан коннект: Астанада STEM, AI және білім берудегі инновациялар талқыланды

Астанада «Назарбаев Зияткерлік мектептері» ДББҰ Педагогикалық шеберлік орталығы ұйымдастырған халықаралық жас педагогтер коннекті өтті, - деп хабарлайды Aikyn.kz сайты.

Бұған дейін «Жас ұстаз: табысқа апарар жол» республикалық форумы ретінде жүзеге асып келген жоба биыл ауқымын кеңейтіп, «STEM. AI. Innovation» атауымен халықаралық кәсіби алаңға ұласты. Бағдарлама STEM-білім беру, жасанды интеллект мүмкіндіктері және инновациялық педагогикалық тәжірибелерді оқу үдерісіне тиімді енгізу мәселелерін қамтыды.

Коннектке Қазақстан Республикасының Оқу-ағарту министрі Жұлдыз Сүлейменова қатысып, жас педагогтерге кәсіби жолда үздіксіз ізденіс пен жаңашылдыққа ұмтылудың маңызын атап өтіп, алдағы еңбектеріне сәттілік тіледі. «Назарбаев Зияткерлік мектептері» ДББҰ Басқарма төрағасы Әнуар Жанғозин білім берудегі технологиялық өзгерістер жағдайында мұғалімнің рөлі жаңа мазмұнға ие болатынына назар аударды.

– Жасанды интеллектіні меңгерген ұстаз мектептегі өзгерістің негізгі қозғаушы күшіне айналады. Технология қаншалықты жетілсе де, ол баланың бойында білімге деген құштарлықты, сыни ойлауды немесе өзіне деген сенімді өздігінен қалыптастыра алмайды. Бұл – мұғалімнің кәсіби шеберлігі мен адамдық ықпалына байланысты. Сондықтан бүгінгі міндет – технологиядан қауіптену емес, оның мүмкіндігін ұстаздың әлеуетін күшейтуге тиімді пайдалану, – деді Әнуар Қанатұлы.

Екі күн ішінде қатысушылар қазақстандық және халықаралық сарапшылармен бірге жасанды интеллект құралдарын, STEM тәсілдерін және заманауи білім беру модельдерін оқу үдерісінде қолданудың тиімді жолдарын талқылады.

TED форматындағы сессияларда білім берудегі инновациялық экожүйені дамыту, жасанды интеллект мүмкіндіктерін пайдалану, венчурлік ойлау мәдениеті және Қазақстандағы білім беру жүйесін цифрландыру тәжірибесі сөз болды.

Спикерлер қатарында инновациялар және жасанды интеллект саласындағы сарапшы, кәсіпкер Давид Туғанов, венчурлік инвестор Бахт Ниязов, Орталық Азия бойынша «Жылдың IT-педагогі» атағына ие болған және Forbes-тің «30 Under 30» тізіміне енген Рүстем Ермеков болды.

Сондай-ақ Қытайдағы Shaanxi Normal University білім беру технологияларының профессоры, доктор Hongliang Ma жасанды интеллект дәуірінде педагогтердің кәсіби құзыреттерін дамыту тақырыбында баяндама жасады.

Коннекттің практикалық бөлігінде NIS педагогтерінің шеберлік сағаттары, қолданбалы тапсырмалар, командалық квесттер және инновациялық жобалардың таныстырылымдары өтті. Қатысушылар жаңа технологияларды сабақта қолданудың нақты тәсілдерін сынап, әріптестерімен тәжірибе алмасты.

– «Жас ұстаз» форумына осымен екінші рет қатысып отырмын. Жаңа оқу жылы қарсаңында мұндай алаң бізге жаңа идея, кәсіби серпін және ерекше мотивация береді. Форумның халықаралық деңгейге көтеріліп, әр елдегі әріптестермен тәжірибе алмасуға мүмкіндік бергені қуантады. Әр делегат өз өңіріне тың идеялармен оралады деп сенемін, – деді Ақтөбе облысы Мұғалжар ауданынан келген жас мұғалім Әділбек Батырбек.

Айта кетейік, «Жас ұстаз: табысқа апарар жол» жобасы 2022 жылы еңбек жолын жаңадан бастаған педагогтердің кәсіби дамуы мен кәсіби ортаға бейімделуіне қолдау көрсету мақсатында басталған. Осы уақытқа дейін жоба аясындағы республикалық форумдарға 1000-нан астам жас педагог қатысып, өңірлік іс-шаралар 20 мыңға жуық мұғалімді қамтыды.