Трамп АҚШ Венесуэланың қанша мұнайына ие болғанын айтты

АСТАНА, 9 қаңтар - Sputnik. АҚШ президенті Дональд Трамп Вашингтон Венесуэла мұнайын сатудан миллиардтаған, тіпті триллиондаған доллар табуды жоспарлап отырғанын мәлімдеді, деп хабарлайды РИА Новости.

"Біз миллиардтаған долларға теңесетін Венесуэла мұнайы туралы айтып отырмыз. Ол уақыт өте келе жүздеген миллиардқа, содан кейін триллионға айналады. Біз ел ретке келтірілгенше Венесуэлада боламыз", - деді америкалық көшбасшы Fox News тілшісі Шон Ханнитиге берген сұхбатында.

Ол сондай-ақ АҚШ бір күнде 4 миллиард долларлық Венесуэла мұнайын алғанын мәлімдеді.

"Біз бір күнде құны 4 миллиард доллар болатын мұнай алдық және бұл сан өсе береді", - деді ол сұхбатында.

Трамп бұған дейін Венесуэланың уақытша билігі АҚШ-қа 30-50 миллион баррель мұнай беретінін мәлімдеп, Каракас тасымалдайтын мұнай нарықтық бағамен сатылатынын және бұл ақша Венесуэла мен АҚШ халқына пайда әкелетінін уәде еткен.