Түркістан облысында Ақмешіт үңгірі маңындағы 2 гектар жер мемлекет меншігіне алынды

Ақмешіт үңгірі – Бәйдібек ауданындағы туристер жиі баратын нысандардың бірі. Аталған үңгір «Асқар ата» шаруа қожалығына тиесілі жер аумағында орналасқан.

Аудандық жер қатынастары бөлімінің хабарлауынша, облыс әкімінің 2024 жылғы қаулысымен үңгірдің сызбасы бекітіліп, 9,95 гектар қорғау аймағының көлемі анықталған.

ҚР «Жер қойнауы және жер қойнауын пайдалану туралы» Кодексіне сәйкес, қожалыққа тиесілі аумақта орналасқан жер асты қойнауын пайдалану үшін жергілікті әкімдік пен шаруашылық арасында арнайы келісімшарт жасалуы тиіс. https://kaz.inform.kz/news/turkstandagi-kiel-zher-zheke-kaspkerdn-tabis-kozne-aynalgan-dc8a55/?ysclid=mny9j8v7iq708838336

Ведомство мәліметінше, аудан әкімдігі мен «Асқар ата» шаруа қожалығы арасында Ақмешіт үңгірін пайдалану жөнінде ешқандай келісімшарт болмаған. Осы уақытқа дейін нысан заңсыз пайдаланылып келген.

Белгілі болғандай, жер телімі ауыл шаруашылығы мақсатында жалға берілген. Яғни, ол тек егін егу немесе мал шаруашылығы үшін пайдаланылуы қажет еді. Алайда шарт талаптары бұзылып, жер кәсіпкерлік мақсатта қолданылған. Атап айтқанда, шаруашылық жалға алынған аумақты туристік және өзге де коммерциялық қызметке пайдаланған.

– «Ақмешіт» үңгіріне қатысты 2025 жылғы 24 желтоқсандағы дауды сот процесі барысында медиация тәртібімен реттеу туралы келісімге сәйкес, «Асқар ата» шаруа қожалығының төрағасы 2026 жылғы 28 қаңтарда жер телімін мемлекет мұқтажы үшін қайтару жөнінде өтініш берген. Соның негізінде Бәйдібек ауданы әкімдігінің 2026 жылғы 13 ақпандағы қаулысына сәйкес 2 гектар жер телімі мемлекет меншігіне алынды, – делінген аудандық жер қатынастары бөлімі ұсынған ақпаратта.

Сонымен қатар, аталған қаулыға сәйкес жер телімдерінің мемлекеттік актілерін өзгерту үшін жерге орналастыру жобасын бекіту мақсатында 6 сәуірде өтініш берілген.

Облыстық туризм басқармасының мәліметінше, өңірде 2025-2029 жылдарға арналған туризмді дамыту жоспары бекітілген. Оған сәйкес, Ақмешіт үңгірі мен Бәйдібек ауданындағы туристік нысандарды кешенді дамыту көзделіп отыр.

Жоспар аясында модульдік нысандар орнату, инженерлік инфрақұрылымды дамыту, сондай-ақ үңгірді дамытудың эскиздік жобасын әзірлеу қарастырылған.

– Сонымен қатар шағын және орта бизнесті дамытуға қолайлы жағдай жасау, үңгір ішіндегі қауіпсіз туристік маршруттарды әзірлеу көзделген. Бұл бағытта ақпараттық тақтайшалар орнату, қозғалыс бағыттарын белгілеу, фотоаймақтар мен жаяу жүргіншілер жолдарын ұйымдастыру жұмыстары жүргізіледі, – деді басқарма өкілдері.

Нысан аумағын ұялы байланыс және мобильді интернет желісімен қамтамасыз ету бағытында да тиісті шаралар қабылданады.

Бұдан бұрын Түркістан облысында Домалақ ана кесенесіндегі шырақшылар сот шешімімен мәжбүрлеп шығарылатынын жазған едік.