Түркістан облысында мақта терімі аяқталды

Биыл өңір шаруалары ағын су тапшылығына қарамастан мол өнім алды.

Қазірдің өзінде мақта зауыттарына 428 мың тонна ақ алтын жиналып, өңделе бастады. Ауыл еңбеккерлері мұндай нәтижеге мемлекет қолдауының арқасында қол жеткіздік дейді. Оның үстіне биыл шаруалар үшін қажетті минералды тыңайтқыштар мен жанар-жағармай дер кезінде жеткізілген.

Ордабасы ауданы Төрткүл ауылындағы мына шаруашылық биыл 1100 гектар алқапқа мақта екті. Әр гектарынан 40-тан 58 центнерге дейін өнім алды. Ақ алтынды шашпай-төкпей жинап, мақта зауытына өткізді. Қазір тау болып жиналған ақ алтынды жұмысшылар тазартып, өңдеуге дайындап жатыр. Серіктестік басшысы биылғы қуаңшылық шаруаларға оңай тимегенін айтады.

Мейірхан Батырбеков, серіктестік директоры:

- Биыл өзі Үкімет, министрліктен адам қойып, бақылауда ұстады. Суды кезекпен берді. Бірақ жаман болған жоқ. Сонда да жақсы өнім алдық. Одан кейін Үкіметтен тұқымдыққа субсидия, жанармай жеңілдетіліп берілді. Дәрі-дәрмектер жеңілдетіліп берілді. Үкіметтен көп жәрдем берді. 

Биылғы қуаңшылықтың зардабы жетісайлық шаруаларды да айналып өтпеді. Көршілес Өзбекстаннан келетін Достық каналындағы суға мақташылар түнделетіп кезекке тұрған кездері де болғанын айтады. Ағын су жылдағыдан 20 күнге кеш беріліп, кейбір алқаптар қыркүйек айына дейін суғарылған. Десе де, күзде шаруаның еңбегі ақталды.  

Ералы Бекенов, шаруа:

- Жалпы өнімді 30 центнерден алдық. Үкімет тарапынан беріліп жатқан селитралар уақытылы беріліп жатты. Облысымызға министр екі мәрте келіп кетті. Одан бөлек біздің облыс әкімі жиі-жиі аралап тұрды, шаруалардың жағдайын білейін деп. Солардың атсалысуынан өнімдерімізді уақытылы жинап алдық. Шығынымызды ақтадық. Зауыттарға тапсырдық. 

Биыл Түркістан облысының шаруалары 144 мың гектар алқапқа мақта егіп, бүгінде жиын-терім жұмыстары аяқталды. Өнім зауыттарға тасымалдануда. «Өнімділігі жоғары сорттарды егіп, минералды тыңайтқыштар дер кезінде берілгендіктен биыл өнім сапасы жақсы»,- дейді мамандар. 

Ақтөре Түймебек, облыстық ауыл шаруашылығы басқармасының бөлім басшысы:

- Дала және жиын терім жұмыстарына 99,3 мың тонна жанар-жағармай бөлінді. Бұл өткен жылмен салыстырғанда екі есе артық. 781 мың гектар алқапқа 227 мың тонна минералды тыңайтқыштар ендірілді. Одан бөлек көктемгі дала жұмыстарына несиелік-кредиттік ресурстар уақтылы бөлінді. 

Шетелдік компаниялар биыл өңірдегі Отырар, Мақтаарал аудандары мен Арыс қаласының аумағында 52 мың гектар жерге мақта екті. Тамшылатып суару әдісімен егілген ақ алтын гектарына 60-65 центнерден өнім берді. Оң тәжірибені ескерген мамандар шаруаларды келер жылы тамшылатып суару әдісіне көшуге шақырады.

Жандос Жұмабек тілші:

- Биыл өңірде 25 мақта зауыты мен 175 қабылдау бекеті жұмыс істеді. Олар ақ алтынды 200 теңгеден қабылдады. Ал жоғары сұрыпты мақта еккен шаруалар сапасына қарай әр келісін 250-270 теңгеден өткізді. Мамандар келер жылы өңірде мақтадан жіп иіріп, мата шығаратын 2 зауыт іске қосылатынын айтады.

Жандос Жұмабек, Ерболат Әбіш