Түркістан облысында жол ережесін өрескел бұзып, той кортежін ұйымдастырғандар ұсталды

Түркістан облысында полицейлер жол ережесін бұзған той кортежін анықтады, – деп хабарлайды Aikyn.kz Polisia.kz-ке сілтеме жасап.

Түркістан облысында "Қауіпсіз жол" жедел-профилактикалық іс-шарасы барысында Ордабасы ауданы трассаларының бірінде полицейлер жол қозғалысы ережелерін өрескел бұзған той кортежін анықтады. Жедел әрекет ету нәтижесінде тәртіп сақшылары құқық бұзушылардың жеке тұлғаларын анықтап, жауапкершілікке тартты. 

Toyota Land Cruiser, JAC, ВАЗ-2115 және ВАЗ-21099 маркалы көліктердің жүргізушілеріне жол-көлік оқиғасына әсер етуі мүмкін қауіпті жағдай туғызғаны, жол белгілерінің талаптарын орындамағаны және өзге көлік құралдарының қозғалысына кедергі жасағаны үшін шаралар қолданылды. Сондай-ақ құқық бұзушылардан "стробоскоп" құрылғысы тәркіленді. Оларға көлік құралдарына арнайы жарық және (немесе) дыбыс белгі беру құрылғыларын заңсыз орнату, сондай-ақ жедел және қызметтік автокөліктерге арналған түрлі түсті жарқылдауық құрылғысын заңсыз қолдану бойынша әкімшілік шаралар қабылданды. 

Көліктер арнайы айыптұраққа қойылды. Полицейлер жүргізушілермен профилактикалық түсіндіру жұмыстарын жүргізіп, жол қозғалысы ережелерін қатаң сақтау қажеттігін еске салды. 

Тәртіп сақшылары азаматтарды жолда жауапты болып, заң талаптарын мүлтіксіз орындауға шақырады.

Сараптама, зерттеу мақала, күнделікті өзекті ақпаратты «Айқынның»  TELEGRAM   арнасынан табасыз.