Түркияда тұрғын үй қымбаттап барады

Түркияда қазірдің өзінде үй қымбат.

Баспана бағасы да, жалдау ақысы да шарықтап тұр. Бұған дәлел – статистикалық көрсеткіш. Кейінгі бірнеше айда пәтер құны 500 мың лираға өскен. Бұл – біздіңше, 6 жарым млн теңге. Сарапшылар бағаның күрт өсуін баспанаға сұраныстың артуымен байланыстырады. Басқа да себеп көп. 

Әсия Нұрлыбаева, тілші:

-Биыл маусым айында Түркия бойынша 107 мыңнан астам пәтер сатылған. Бұл өткен жылдың сәйкес кезеңімен салыстырғанда, 35 пайызға көп. Ипотекалық, яғни несие арқылы рәсімделген пәтер саны да екі есе өскен. Пәтер сатып алу қарқыны әсіресе Ыстамбұл, Анкара және Измирде жоғары. Ал баға динамикасын көрсететін Түркия Орталық банкінің мәліметіне сәйке, жалпы индекс 174 деңгейіне жеткен. Бұл – бір жылдағы 32 пайыздық номиналды өсім. 

Қалалар бойынша баға Ыстамбұлда 30, Анкарада 38, ал Измирде 32 пайызға өскен. «Баспананың қымбаттауына инфляция, құрылыс материалдары бағасының өсуі және сұраныстың артуы себеп», - дейді сарапшылар.

Үлкү Чевик, Жылжымайтын мүлік агенттігінің директоры:

-Негізі үй бағасы пандемияға дейін-ақ қатты өсе бастады. Оларға несиелер ұсынылып, өте қолайлы пайызбен берілді. Сол кезде көп үй сатылды. Ал қазір көп бөлмелі пәтерге сұраныс аздау. Өйткені депозиттік пайыз өте жоғары. Көбіне 1 бөлмелі шағын пәтерлер тез сатылады. Бұл үйлердің бағасы әр 2–3 ай сайын 500 мың лираға өсіп отырады. Мысалы, бір бөлмелі пәтер 5 млн мен 7 млн лира арасында. Бұл шамамен, 65 млн-нан 90 млн теңгеге дейін.

Әсия Нұрлыбаева, тілші:

-Пәтер жалдау нарығында да жағдай күрделі. Үкімет жалдау бағасын жыл сайын инфляция көрсеткішіне байланысты бекітеді. Бірақ осы айда жалдау ақысына ең жоғары өсім 38,36% деп бекітілді. Бұл – былтырғы  көрсеткіштен 13 пайызға жоғары. Қазір Түркия бойынша пәтер жалдаудың орташа бағасы – 22 мың лира, біздіңше 300 мың теңге шамасында. Ал халық көп шоғырланған Ыстамбұл мен Анкарада 30 мың лира. Бұл – шамамен 400 мың теңге.

Үлкү Чевик, Жылжымайтын мүлік агенттігінің директоры:

-Анкарада пәтер сатып алғаннан гөрі жалға алу сұранысқа ие. Бірақ екеуі де қымбаттап жатыр. Әсіресе жаңа жобалардағы үйлер өте қымбат. Сондықтан екінші нарықтағы үйді сатып алған тиімдірек. Алайда мұның өзі тұрғындардың қалтасына салмақ салады. Сол себепті қымбат болса да, жалға алып тұруға мәжбүр.

Әсия Нұрлыбаева, тілші :

-Түркияда тұрғын үй бағасы мен оны жалдау ақысы тұрғындардың қалтасына салмақ салып отыр. «Дегенмен, инфляция бәсеңдеп, құрылыс қарқыны артса, нарықтың тұрақталуы мүмкін», - дейді сарапшылар.

Ә. Нұрлыбаева, Ж.Сүйіндіков