Ұлттық банктің реттеуші сынақ алаңының мақсаты не

– Стейблкоиннің қолдану аясы кең. Коммерциялық банк рөлін қарастыратын болсақ, біріншіден, стейблкоин теңгемен қамтамасыз етіледі және сол теңге банктің оқшауланған шотында орналастырылып, сақталады. Екіншіден, коммерциялық банктің төлем карталарымен стейблкоинды қолдануға болады. Ұлттық банктің реттеуші сынақ алаңына келер болсақ, ол оқшауланған шектеулі ортада жаңа қаржылық, криптофиаттық сервисті сынақтан өткізу алаңы саналады. Бұл реттеуші сынақ алаңының мақсаты – жаңа криптофиаттық сервисті кеңінен енгізбестен бұрын оның тәуекелдерін бақылап, анықтау. Содан кейін сол тәуекелдерді төмендету ережелерін жасап, кеңінен қолданысқа енгізу, - деді ол.

Оның айтуынша, маусымда Ұлттық банк пен Қаржы нарығын реттеу агенттігі екінші деңгейлі банктерге криптокарта шығаруға рұқсат берген.

– Криптокарта тек қана банк өнімі емес. Ол бірнеше серіктестердің жалпы өзара әрекет етуінің арқасында шығарылады. Оны шығаруға криптобиржа да, банк те қатысады. Криптокартамен төлем жасаған кезде стейблкоин лезде теңгеге конвертацияланып, теңге түрінде кәсіпкерге түседі. Бұл бірнеше секунда іске асатын тетік саналады. Стейблкоинның артықшылығы ол теңгемен 100 пайыз бірге-бір қамтамасыз етіледі. Сондықтан бағалық ауытқуы тәуекелі төмен, - деді Бақыт Смекенов. 

Бұған дейін елімізде теңгеге байланған алғашқы стейблкоин іске қосылғанын жазған едік.