Ұлыбритания Лукойлға санкция енгізді: Қазақстандағы жобаларға әсері қандай?

«Лукойл» Ұлыбританияның санкциялық тізіміне енгізілді. Бұл қадам компания акционері Вагит Алекперовтің Қазақстан Президенті Қасым-Жомарт Тоқаевпен ынтымақтастықты кеңейту жөнінде талқылап, Қазақстандағы 30 жылдық жұмысын атап өткен күннен кейін жүзеге асты, деп хабарлайды «Нефть и газ Казахстана» телеграм-каналы.

Қазақстанда «Лукойлдың» Теңіз және Қарашығанақ жобаларында үлестері бар, сондай-ақ ол КҚК арқылы мұнайын экспорттайды. Перспективалық жоба — «ҚазМұнайГаз» компаниясымен бірлескен (50/50) Қаламқас-Хазар шельфтік кен орнын игеру. Жоспар бойынша келесі жылы Қазақстандағы верфтерде жобаның теңіз платформаларын салу басталады. Бұл жоба жылына 4 млн тонна мұнай өндіруді көздейді.

Санкция «Лукойлға» халықаралық банктер, әсіресе британдық немесе олардың қатысы бар банктер арқылы қаржы тартуда қиындықтар туғызуы мүмкін. Санкциялар Ұлыбритания юрисдикциясына кіретін қаржы институттарымен операцияларды шектейді. Еске салсақ, жобаның бастапқы бюджеті шамамен $6 млрд деп бағаланған.

Британ санкцияларын орындауға міндетті елдердің мердігерлеріне «Лукойлмен» жұмыс істеуге тыйым салынуы мүмкін.

Егер Қаламөас-Хазар жобасында қолданылатын технологиялар мен жабдықтар Ұлыбританиядан жеткізілетін болса, санкциядан кейін оларды жеткізуге тыйым немесе кідірістер туындауы мүмкін.

Жалпы, барлық серіктестер, мердігерлер, банктер, сақтандыру компаниялары «Лукойлмен» ынтымақтастықты жоғары тәуекелді деп қарастыруы мүмкін, бұл қосымша тексерістерді талап етіп, қызмет құнын арттыруға немесе қызмет көрсетуден бас тартуға әкелуі ықтимал.

Бүгін, 11:59