Ұлытау облысында Жас ғалым жобасы жүзеге асып жатыр

Ұлытау облысында оқушыларға арналған «Жас ғалым» жобасы жүзеге асып жатыр.

Елдегі жетекші университеттің ғалымдары ғылымға бет бұрған жастарға бағыт-бағдар сілтеп, жетекшілік етеді. Ұстаздар бұл жоба бастауыш сыныптан-ақ оқушылардың ғылымға деген қызығушылығын оятуға  сеп болады дейді. Мәселен, жоба басталған бір жылдың ішінде өңірде 5 оқушы халықаралық ғылыми жарыста жүлдегер атанған.

Жұрт жаппай қолданып жүрген су тазалайтын фильтр оның құрамындағы пайдалы элементтерді де сүзіп алады. Білім –инновация мектебінің оқушысы Алан Сарқыт судың қүрамындағы тек зиянды заттарды тазалайтын технология ойлап тапқан. Жоба облыстық іріктеуде үздік шықты. Болашақ химик жобасын әлі де жетілдіріп, ғалымдар талқысына ұсынамын дейді.

Алан Сарқыт, оқушы:

- Өзіміздің күнделікті ішіп жүрген суымыздың таза еместігін көрсетті және оны шешуге болатын шешімдерін көрсеттік. Біз жәй фильтрден өткіземіз, дегенмен одан да күштірек фильтрлер бар. Оның ішіндегі керек емес темірлер бар, ол темірлерді алып тастайтын фильтрлер бар. Сол фильтрден өткіземіз. Сол кезде су ішуге пайдалы және зияны аздау болады. 

Ал №26 гимназия оқушысы Глеб Зинченко  улы газды анықтайтын құрылғы жасаған. Оның әдеттегі датчиктен бірнеше айырмашылығы бар. Біріншіден, бұл құрылғыны жасау 3 есе арзан. Екіншіден газ тараған кезде дабыл қағып қана қоймай, улы газдың қаншалықты қауіпті екендігі туралы үй иесінің телефонына хабарлама жібереді.

Глеб Зинченко, оқушы:

- Құрылғының сыртқы қорабын 3D принтермен басып шығардық. Одан кейін бағдарламалау тілін орнаттық. Бұдан бөлек біздің тағы бір жобамыз бар. Ол өртке қарсы құрылғы. Ол от тұтанған жағдайда автоматты түрде сөндіреді.

Өнертапқыш оқушылардың бұл жетістігі «Жас ғалым» жобасының алғашқы жемісі дейді ұстаздар. Бағдарлама аясында ғылымға қызығушылығы бар жастар елдегі іргелі жоғары оқу орындарына барып, белгілі ғалымдардан кеңес алған. Солардың бірі – Нұрәли Алтай. Болашақ ғалым нәтижесінде химия пәні бойынша халықаралық жарыста жүлдегер атанды.

Нұрәли Алтай, оқушы:

- Мектепте биыл жаңадан лаборотория пайда болды. Соның арқасында жаңа реагенттер мен арнайы материалдар келген. Нәтижесінде сабақтан бөлек, лабороториялық жұмыстар жасауға болады. Болашақта атом энергетика мамандығына оқуға түсейін деп жатырмын. Жаңа энергия көздерін ашуға талпынамын немесе су проблемасын шешуге күшімді саламын.

Руслан Төлен, Дарынды балаларды қолдау орталығының директоры:

- Сол ғалымдардың алдында оқушыларымыз тәлім алсын деп отырмыз. Студент кезімізде ғана ғалымдарды көреміз ғой. Біздің мақсатымыз оқушы кезден бастап, тіпті 1-сыныптан бастап ғалымның, ғылымның жолының керемет екенін түсіндіру үшін ғалымдардың алдына отырғызғымыз келіп тұр.

Осыған дейін өңір оқушылары тек гуманитарлық пәндер байқауынан жеңімпаз болған. «Жас ғалым» жобасы жүзеге асқалы 5 оқушы жаратылыстану бағыты бойынша халықаралық жарыста жүлдегер атанды. Сондықтан сала мамандары аталған жобаны әрі қарай жалғастырамыз дейді. Бұдан бөлек дарынды оқушыларды анықтау мақсатында биология, физика пәндері бойынша қосымша олимпиада ұйымдастыруды көздеп отыр.

Авторлары: Елдос Кәкенов, Нұрлан Исмаилов, Нұрбол Үздікбаев