Ұлытауда жабайы жануарларға азық дайындалды

Ұлытауда ұлттық табиғи парк ұжымы жабайы жануарларға азық дайындап жатыр.

Қар қалың жерлерде арнайы қоректену алаңдарын жасақтауда. Бұл жұмыстар жануарлардың қыс мезгілінде аман қалып, табиғи тепе-теңдікті сақтауға көмектеседі дейді мамандар. Сонымен қатар ұлттық парк аумағында мекендейтін, көзге көп түсе бермейтін түз тағыларының санын анықтау мақсатында фототұзақтар орнатылуда. 

Ұлытау ұлттық паркі аумағында құстардың 52, сүтқоректілердің 15 түрі бар. Әсіресе соңғы жылдары қоян мен еліктің саны артып келеді. Олардың қыстан қысылмай шығуы үшін биотехникалық шараларды уақытылы ұйымдастыру маңызды. Биыл мекеме ұжымы жабайы жануарларға арнап 10 тоннаға жуық жем-шөп әзірлеген.

Жаннұр Оразаев, орманшылық басшысы:

- Мынау шөп жабайы аңдарға арналған. Жем саламыз, олардың иммунитеттерін көтеру мақсатында тұздарды қойып, сыпырғыштарды ілеміз. Өйткені Ұлытау селосы маңайында қардың қалыңдауына байланысты, биотехникалық шараларды жүргізу алаңдарын көбейтіп, каждый тоғайлардың араларында осындай жұмыстарды жасаймыз. 

Ұлытау бөктерінде қар жылдағы мөлшерден аз, дегенмен, жабайы жануарларға жем-шөп шашу жұмыстары үздіксіз жүріп жатыр. Себебі күннің жылуына орай қардың беті аздап мұздаққа айналған. 

Мырзабек Мұқанов, орманшы:

- Жалпы биыл енді жабайы жануарлардың, аңдардың жағдайы жаман емес. сонда да қазір енді мұздақ, жылымық боп тұр ғой, содан кейін ұлпа қардың беті қатады да тебінге нашарлап қалады. Содан мынау жазда арнайы дайындаған жем-шөптеріміз бар. Соларды күнделікті әкеліп арнайы орындарға қойып тұрамыз. Таңертең келгенде осы жоқ болады ғой, жеп кетіп жатыр. 

Ұлттық парктің ғылыми қызметкерлері күн сайын тұрақты бақылау жүргізіп, мәліметтерді арнайы базаға тіркейді. Соңғы санақ нәтижелері жануарлар санының өскенін көрсетіп отыр. Атап айтқанда, сұңқылдақ аққу, ақбас үйрек пен қасқыр көбейген. Ел ішінде қорық аумағында бұрын болмаған аңдарды да көрдік деген ақпар бар. 

Жанайдар Орынбек, табиғи кешендерді қорғау инспекторы:

- Қазіргі таңда Ұлттық парк төңірегінде аңдардың саны едәуір көбейіп келе жатыр. Оны біз қысқы және көктемгі санақтардан анықтаймыз. Адамдардың айтуы бойынша осы ұлттық парк төңірегінде сілеусін, арқар деген сынды аңдар кездесуі мүмкін. Соларды анықтау үшін біз осы фототұзақтарды құрамыз. 

Мамандардың айтуынша, саябақ аумағында жабайы жануарлар санының артуы табиғи тепе-теңдікті сақтауға мүмкіндік береді дейді. Ал ол экожүйені қалыпқа келтіреді.

Елдос Кәкенов, Нұрлан Исмаилов, Гүлшаһира Серекбаева