Үш баритон вокалдық музыка кеші Астана Операда басталмақ

26 қазанда «Астана Опера» елорда тұрғындары мен қонақтарын «Үш баритон» вокалдық музыка кешіне шақырады, - деп хабарлайды Аikyn.kz сайты.

Бұл күні Үлкен зал сахнасына дарынды жас опера әншілері – халықаралық байқаулардың лауреаттары шығады. Концертте Қазақстанның еңбек сіңірген қайраткері Ерболат Ахмедьяровтың жетекшілігімен театрдың симфониялық оркестрі мен хоры да өнер көрсетеді. 

– Классикалық опералық тенорлар – испаниялық Пласидо Доминго мен Хосе Каррерас және италиялық Лучано Павароттидің сонау 1990 жылдан 2003 жылға дейін «Үш тенор» атауымен концерттер бергені белгілі. Бұдан бөлек, әлемде өз жобаларын жүзеге асырған осы секілді басқа да триолар мен квартеттер көптеп саналады. Ал Қазақстанда «Үш баритон» концертін алғаш таныстырған біз болдық деп мақтанышпен айта аламыз. Мұндағы басты мақсатымыз – қазақ опера өнерін насихаттау, – деп атап өтті театрдың опера труппасының солисі Дінмұхамед Көшкінбаев.

Айта кетейік, «Үш баритон» концерті «Большая опера» әйгілі телевизиялық жобасының жеңімпазы Дінмұхамед Көшкінбаевтің және «Дарын» мемлекеттік жастар сыйлығының лауреаттары Расул Жармағамбетов пен Азат Мәліктің бірлескен идеясы нәтижесінде пайда болған. 

– Алғашқы концертіміз осы жылдың басында К.Байсейітова атындағы Камералық залда зор жетістікпен өтті, одан кейін біз оны Қарағандыда ұсындық. Бірегей жобаны әрі қарай Үлкен сахнада таныстырамыз деп әу баста жоспарлаған едік. Осы ретте көрсеткен қолдауы үшін «Астана Опера» басшылығына зор алғысымызды білдіреміз, – деді танымал баритон.

Сондай-ақ ол әртістердің бұл жобаны әрі қарай дамытқылары келетінін, «Үш баритон» концертімен бүкіл Қазақстанды, сондай-ақ алыс-жақын шет елдерді аралау ойларында бар екенін қоса айтты. Осылайша олар қазақстандық композиторлардың операларын шетелдік аудиторияға кеңінен таныстырмақ. 

– Біз сахнада әріптес болсақ, ал өмірде – жақын достармыз. Үшеуіміздің таныстығымыз осыдан он жыл бұрын басталған еді. Концерттік алаңдар мен байқауларда жиі жолығып жүрдік. Мәселен, Расул Жармағамбетов кезінде мен білім алған Құрманғазы атындағы Қазақ ұлттық консерваториясында оқыған. Ал Азат Мәлік осы Астана қаласындағы К.Байсейітова атындағы Қазақ ұлттық өнер университетін тамамдаған. Әрқайсысы – өзінің шығармашылық жолын қалыптастырған кәсіби опера әншісі. Бізді табыстырған – сахна, – деп түйіндеді Д.Көшкінбаев.

Ауқымды бағдарламаға қазақ және еуропалық композиторлардың туындыларынан ариялар мен романстар, сондай-ақ неополитандық әндер енді. Баритондар Дінмұхамед Көшкінбаев, Расул Жармағамбетов пен Азат Мәлік Ренато, Родриго, Форд, Алеко, Абай, Серке сынды кейіпкерлердің бейнелерінде шығады.