Зейнетақы қорынан тұрғын үй төлемдерін заңсыз аудару схемалары анықталды

АСТАНА, 16 қазан – Sputnik. Қазақстанның кейбір аймақтарында зейнетақы қорынан тұрғын үйге заңсыз ақша аудару схемалары анықталды. Бұл туралы қаржылық мониторинг агенттігі төрағасының орынбасары Жеңіс Елемесов мәлімдеді, деп хабарлайды Sputnik Қазақстан тілшісі.

Бұған дейін агенттік жалған стоматологиялық қызметтер арқылы зейнетақы төлемдерін аудару фактілерін анықтаған болатын. Бүгінде тұрғын үйге де ақша аударудың заңсыз схемалары анықталып отыр.

"Кейбір аймақтарда тұрғын үйге арналған төлемдер арқылы ақша алу фактілері анықталуы мүмкін. Бірақ әзірше тіркелген істер жоқ", - деді Елемесов сенаттағы брифингте.

Sputnik Қазақстан тілшісі агенттік төрағасынан осы схемалар жайында сұрады. Оның айтуынша, жалған стоматологиялық қызметтерге ақшаны қалай шығарса, тура солай тұрғын үйге арналған төлемдерді шығару фактілері бар.

"Мен сотқа дейінгі тергеудің мәліметтерін жариялай алмаймын. Оны стоматологияға қалай шығарса, тура солай істеген. Қосымша ақпаратты кейінірек жариялаймыз", - деді Елемесов.

Айта кетері, бүгінде зейнетақы қорындағы ақшаның жеткіліктілік шегінен асатын бөлігін тұрғын үй жағдайын жақсартуға жұмсауға болады. Атап айтқанда, Отбасы банкіндегі депозитке аударуға, үй сатып алуға немесе ипотеканы жабуға мүмкіндік бар.