​Зеленский: Украиндар өз тәуелсіздігін қорғады

«Украиндар өз тәуелсіздігін қорғады, ал Ресей президенті Владимир Путин көздеген мақсатына жете алмады». Украина президенті Владимир Зеленский қақтығыстың төртінші жылдығына орай осындай пікір білдірді, деп хабарлады АА.

«Бүгін тура төрт жыл болды, Путин Киевті үш күнде алады деген. Бұл біздің қарсылығымыз туралы, Украина осы уақыт бойы қалай күресіп келе жатқаны туралы көп нәрсені айтады. Бұл сөздердің артында – миллиондаған халқымыз, үлкен батылдық, ауыр еңбек, төзімділік және Украина 24 ақпаннан бері жүріп өткен үлкен жол тұр», – деп жазды Зеленский өзінің Telegram-арнасында.

Президент: «басқыншылықтың басталуын еске алып, бүгінгі күнге қарасақ, украиндар толықтай «тәуелсіздікті қорғадық» және «мемлекеттілікті жоғалтпадық» деп айта алады», деп атап өтті.

«Путин өз мақсаттарына жете алмады. Украиндарды сындыра алмады, бұл соғыста жеңіске жеткен жоқ. Біз Украинаны сақтап қалдық және бейбітшілік пен әділеттілікке қол жеткізу үшін бәрін жасаймыз», – деді Зеленский.

Өз үндеуінде Зеленский Банкова бункеріндегі шағын бөлмеде қақтығыстың алғашқы күндерінде әлемдік көшбасшылармен алғашқы әңгімелерін еске алды.

«Мен осында президент (Джо) Байденмен сөйлестім және дәл осы жерде: «Владимир, қауіп бар, сізге Украинаны дереу тастап кету керек. Біз бұған көмектесуге дайынбыз» дегенді естідім. Ал мен бұл жерге такси емес, қару керек екенін айттым», – деді украин көшбасшысы, оның сөздерін жергілікті БАҚ келтірді.

Украина президенті әрбір көмек пакетін, қару-жарақ партиясын және Ресейге қарсы санкцияларды «шын мәнінде күресіп алу» қажет болғанын айтты.

Президенттің айтуынша, бұл Еуропа елдеріне, АҚШ Конгресіне, көптеген парламенттерге және бүкіл әлемдегі қарапайым адамдарға жасалған үндеулердің негізгі мазмұны болды.

Зеленский сондай-ақ «қазір украиндар тарихтағы ең ауыр қысты өткеріп жатыр», бірақ соған қарамастан барлық жерде нәтижелерге қол жеткізіп отырғанын атап өтті.

Бүгін, 12:34