Жағдайың қалай, журналист: 28 маусым БАҚ күні

АЛМАТЫ, 26 маусым – Sputnik. 28 маусым Қазақстандағы бұқаралық ақпарат құралдары қызметкерлерінің төл мерекесі.

Бүгінгі күні елімізде 5303 бұқаралық ақпарат құралдары бар. Елдің әлеуеті мен экономикасына үлес қосқан төртінші билік өкілдері туралы Sputnik Қазақстан айтады.

Қазақ журналистикасының тарихы

1997 жылы дәл осы күні алғашқы "Бұқаралық ақпарат құралдары туралы" Заң қабылданды. Содан бері аттай 29 жыл өтті. Қазақстандағы БАҚ саласы біртіндеп дамып, бүгінде жаңа деңгейге жетті. Ақпарат айдынының мамандары жаңа белестерді бағындырумен келеді.
Қазақ тарихындағы басылымның алғашқы қарлығашы - "Түркiстан уәлаятының газетi", ол 1870 — 1882 жылдары Ташкентте шыққан. Одан кейін Омбыда жарық көрген "Дала уәлаятының газетi", ол төрт жыл жарық көрген. Ең алғашқы ағартушылық бағыттағы "Қазақстан" газетi, ол Ордада және Оралда жарыққа шықты. Қазақ тарихындағы ең алғашқы журнал ақын-демократ Мұхамеджан Сералин ұйымдастырған "Айқап" журналы. 1913 жылы қазақ даласында небәрі 11 газет болса, 1975 жылы олардың саны 407-ке жеткен. Міне араға ғасыр салып, Қазақстандағы БАҚ құлашын кеңге сермеп, дамып келеді.

Қазақстанда қанша БАҚ бар

Қазақстанда қанша бұқаралық ақпарат құралдары бар, бұл туралы тілшіміз Қазақстан мәдениет және ақпарат министрлігі ақпарат комитеті БАҚ саласындағы рұқсат беру құжаттары басқармасының бас сарапшысы Дамир Мединамовтан сұрап білді. Оның айтуынша дәл қазіргі күні Қазақстанда 5303 бұқаралық ақпарат құралдары бар.

"Оның 4988 отандық, 315-і шетелдік бұқаралық ақпарат құралдары. Ең көп бұқаралық ақпарат құралдары Алматы қаласында орналасқан. Оның ішінде ең көп есепте тұрған - мерзімді баспа басылымы. Барлығы 3181, газет саны 1902, журнал саны 1297. 1659 БАҚ қазақ және орыс тілдерінде ақпарат таратады. Тек орыс тілінде ғана хабар тарататын 581 бұқаралық ақпарат құралы бар. Ал тек қана қазақ тілінде ақпарат тарататындар саны - 895", - дейді Дамир Мамадинов.

Бас сарапшының айтуынша, Қазақстандағы БАҚ саны тек мұнымен шектелмейді, өзгеріп отырады. Келесі жылы емес, келесі айдың өзінде жаңа БАҚ пайда болуы әбден мүмкін.

Алматы көш бастап тұр

Бұқаралық ақпарат құралдары санының көптігінен Алматыдан кейін Астана тұр. Мұнда барлығы 993 мекеме тіркелген. Ал ақпарат мекемелері ең аз облыс – Маңғыстау, мұндағы БАҚ саны – 70.
Жалпы ел бойынша бойынша мерзімді баспа басылымы басқа ақпарат құралдарына қарағанда басым тұр:

мерзімді баспа басылымы – 3181;

электронды БАҚ – 350;

интернет бАҚ саны - 1497.

Қазақстандағы шетелдік БАҚ саны

Республикада үш тілдеде ақпарат тарататын 1853 мекеме бар. Биылғы жылдың 4 маусымдағы жағдай бойынша Қазақстанда 315 шетелдік БАҚ есепке қойылған, олар:

Ресей телеарнасы – 223;

Ұлыбритания – 20;

АҚШ – 15;

Эстония – 19;

Франция 13;

Польша – 8;

Түркия – 6;

Кипр – 4;

Армения – 1;

Испания – 1;

Люксембург – 1;

Өзбекстан - 1.

Ел өміріне елеулі үлес қосқан

Биыл журналистердің еңбегі ерекше бағаланды. Өйткені ел тарихында жаңа Конституцияны қабылдауға журналистердің қосқан үлесі зор болды. Бұл туралы президенттің өзі ерекше атап өтті.

Ол журналистер қауымы Конституциялық комиссияның қызметі туралы сапалы және мазмұнды хабарлар таратқанын және Ата заңға енгізу үшін ұсынылған түзетулерге қатысты жан-жақты талдау жұмысын жүргізгенін айтты.

Тағы бір қуанышты жаңалық, биыл алғаш рет облыстарда жұмыс істейтін журналистерге пәтер кілті табысталады. Бұл туралы Қасым-Жомарт Тоқаев БАҚ саласы қызметкерлерін марапаттау рәсімінде сөйлеген сөзінде айтты.