Жамбыл облысы Рысқұлов ауданының шаруалары мал ұрлығының ашылмайтынына шағымданды

"Жоғалған мал табылмайды, ұрылар ұсталмайды".

Осылай деген Жамбыл облысы Тұрар Рысқұлов ауданының бір топ шаруасы біздің арнаға хабарласты. Ауданда жыл басынан бері 86 бас мал ұшты-күйлі жоқ.

Ал аудан полициясы бар мүмкіндікті қарастырып жоғалған малды іздестіріп жатқанын айтады. Бір есептен былтырғыға қарағанда қылмыс азайды дейді олар.

Шағымын айта  келген мына шаруалар Тұрар Рысқұлов ауданының 5 ауылынан жиналған.  Солардың бірі Ерболат Жаппасов.  Жарты жыл бұрын 30 бас жылқым  ізім-қайым жоғалды дейді.  Содан бері малдан да, ұрыдан да хабар болмапты. 

Ерболат Жаппасов, Көгершін ауылының тұрғыны:

- 18 миллионнан аса шығын келтірілді. Күн көрісіміз сол. Табылмай жатыр әлі күнге, мойындамайды біздікін. Мойындағанымен босанып кетіп жатыр. Ондай жеңілдіктер бола берсе, ұрлық тоқтамайды.

Жалпы жыл басынан бері ауданда 86 бас мал қолды болған. Оның 40-ы ұсақ мал болса, қалғаны ірі қара. 

Мелтен Айдарәлиев, Құмарық ауылының тұрғыны:

- Кредит алып айлығым мен шайлығыма жаратып отырған малымды ұры ұрлап кетті. 5 май күні тау бөктерінде фазендадан айдап кетті үйірімен жылқымды. Табылмады, жоқ.

Аудандық полиция бөліміндегілер  қол қусырып отырған жоқпыз, - дейді. Барлық іс бойынша күдіктілер анықталып, сотқа дейінгі тергеу жүргізілген.

Ерлан Түменбаев, Т.Рысқұлов аудандық полиция бөлімінің басшысы:

- 30 бас жылқысы жоғалуына байланысты, арыз түсуіне байланысты қылмыстық іс 188 бабының 4-бөлігімен тергеп тексеру басталды. Қазіргі таңда полиция қызметкерлері мен жедел тергеу тобы құрылып жасалған қылмыс бойынша іздестіру іс шаралары жүргіщілуде. Іс полиция департаменті басшысының бақылауында. Осы айдың аяғына дейін ол сотқа жолданатын болады. 

Ал аудан прокурорлары керісінше былтырғымен салыстырғанда  мал ұрлығы азайды дейді. Былтыр  14 дерек тіркелсе, биыл 8 қылмыс болған. Айтуларынша, құқыққорғау органдары алдын алу шараларын жүргізіп,  ұрланған малды қайтарып жатыр.

Болат Қалыбаев, аудан прокуроры:

- Ағымдағы жылдың өткен 11 айында мал ұрлығы 42 пайызға 14-тен 8-ге төмендеген. 6-ы ашылды. 71 пайызды құрап отыр. 2 қылмыстық іс тараптардың татуласуына байланысты тоқтатылды. Ал 3 қылмыстық іс бойынша тиісті тергеу әрекеттері жалғасуда. 1 қылмыстық іс аудан прокуратурасының зерделенуінде.

Жалпы, өңірде  жыл басынан бері  781 бас мал ұрланған. Тәртіп сақшылары қылмыстың алдын алу үшін облыс бойынша 79 пост орнатып, көліктерді тексеріп жатыр. Нәтижесінде мал ұрлығымен тұрақты түрде айналысқан 13 қылмыстық топ мүшелері ұсталды. 528 түлік иесіне қайтарылған. Ал қылмыстың ашылуы 71 %-тен асты дейді, - жауаптылар.

Мерей Бает, Тимур Сейілхан, Елдар Байділдә