Жамбыл облысында 3,8 млн мал қыстап жатыр

Облыс әкімдігінің мәліметінше, қыстап жатқан малдың негізгі бөлігін - 3,2 млн қой мен ешкі құрайды.

Сондай-ақ 450,1 мың ірі қара, 183,6 мың жылқы және 8,3 мың түйе қысқы жайылымға жіберілген.

Суық маусымға шаруашылықтар алдын ала дайындалған. Мал азығы ретінде 2,2 млн тонна шөп, 92,1 мың тонна сүрлем, 119,9 мың тонна пішендеме, 480,3 мың тонна сабан және 214 мың тонна құрама жем қоры жасақталған.

Жалпы 5 862 қыстақ пункті пайдаланылуда.

Мал шаруашылығы саласында еңбек ететін азаматтар үшін де қажетті инфрақұрылым әзірленген. Атап айтқанда, 5 564 тұрғын үй жөнделіп, 2 184 қора мен 936 база дайындыққа келтірілген. Жауапты қызметтердің хабарлауынша, қыстату жұмыстары қалыпты режимде өтіп жатыр.

Мамандардың айтуынша, маусымдағы негізгі қауіп – ауа райы жағдайы. Қатты аяз бен қалың қар түскен жағдайда шаруашылықтарға түсетін жүктеме артады. Осыған байланысты жергілікті жерлерде жем-шөп қоры мен малдың жағдайы тұрақты бақылауда, сондай-ақ ветеринарлық-профилактикалық шаралар жүргізілуде.

Айта кетейік, Батыс Қазақстанда ауырған ұсақ мал шығынға ұшырады.