Жамбыл облысында қант қызылшасын жинау науқаны басталды

Жамбыл облысында қант қызылшасын жинау науқаны қыза түсті. Биыл өңір диқандары 250 мың тонна жуық өнім жинауға үмітті. Мәселен, соңғы 10 күнде шаруалар 30 мың тонна тәтті түбір жинаған. Орташа өнімділік гектарынан 40 центнерден айналып жатыр. Ал өнім бірден Меркідегі қант зауытына жеткізілуде.

Тәжірибелі дихан Таласбек Шертаев қант қызылшасын егумен 20 жылдан астам уақыттан бері айналысады. Биыл ол 32 гектар алқапқа дән сепкен. Соңғы егіс маусымы шаруаны біраз әбігерге салған. Ол жиналған өнімін өткізе алмай әлекке түскен. Ал, биыл барлық мәселелер дер кезінде шешілгенін айтады. 

Таласбек Шертаев, шаруа:

- Биылғы уборканы айтсақ, басталмай жатып жиналыс жасағанбыз. Әр аудандарға мынадай таллондар берген. Міне, осындай таллондармен кіріп жатырмыз. Қатты бір алып бара жатқан проблема жоқ. Штаттық режимде жұмыс істеп жатырмыз. 

Жалпы биыл өңір шаруалары алты мың гектар алқапқа қант қызылшасын еккен. Бұл былтырғы жылмен салыстырғанда екі есе аз. Оған себеп өткен жылы диқандар дайын өнімдерін өткізе алмай дағдарып қалған еді. Жауаптылар: «биыл мұндай мәселе болмайды», - деп сендіріп отыр.

Саха Манатов, облыстық қызылша өсірушілер қауымдастығының төрағасы:

- Зауыт басшылығымен және әкімдікпен келісіп арнайы кесте жасалды. Яғни әр ауданнның өзінің белгіленген уақыты бар. Қазіргі уақытта қант зауыты өнімнің бір келісін 13 теңгеден қабылдап жатыр. Ал 25 теңгесін мемлекет өтейді. Енді келер жылдары зауыттағы қызылша бағасы көтеріліп, 15-20 теңгеге жетеді деген үміттеміз.

Келесі жылы Тараздағы қант зауыты жаңғыртудан кейін пайдалануға беріледі. Ал Байзақ ауданында жаңа зауыт іске қосылады. Жалпы елімізде тәтті түбірді толығымен өңдеу үшін тағы екі қант зауытын салу керек.

Авторлары: Абзал Азаматұлы, Анастасия Сүлейманова, Эльдар Байділда