Жаңаөзенде жас дәрігерді жұмыс орнында өлтіріп тастады

Алдын ала мәлімет бойынша, екі ер адамның арасындағы жанжалға отбасылық-тұрмыстық жағдай себеп болған. Күдікті полицияға өз еркімен берілді, деп хабарлайды Arasha.kz.

Кісі өлімі 28 қаңтарда болған. Медициналық мекеменің дәлізінде ер адам дәрігерге шабуыл жасап, пышақ сұққан. Маңғыстау облыстық полиция департаментінің хабарлауынша, жанжал отбасылық-тұрмыстық қатынастар негізінде туындағаны анықталды. Пышақ жарақаты салдарынан 29 жастағы ер адам қайтыс болды.

Оқиғадан кейін күдікті Жаңаөзен қалалық полиция басқармасына өз еркімен келіп, қылмысын мойындаған.

Аталған дерек бойынша полиция ҚР Қылмыстық кодексінің 99-бабы 1-бөлігі (Кісі өлтіру) бойынша қылмыстық іс қозғады.

Күдікті уақытша ұстау изоляторына қамалды.

«Болған оқиғаның мән-жайын жан-жақты, толық әрі объективті зерттеуге бағытталған тергеу шаралары жүргізіліп жатыр», — деп мәлімдеді Маңғыстау облыстық ПД.

Ресми емес мәліметтерге сүйенсек, шабуылға қызғаныш себеп болуы мүмкін.