Жангелдиндегі отбасының күйеу баласы мен жұбайына халықаралық іздеу жарияланды

Отбасының екі мүшесінің мәйіті табылып, тағы екі адам жоғалғаннан кейін тергеу жаңа деңгейге өтті.

Бұл істегі басты күдікті — 29 жастағы Сұлтан Сарсемалиев, отбасының күйеу баласы. Тергеу оны жұбайы Ақбаянның ата-анасын өлтірді және басқа туыстарын ұрлады деп күдіктеніп отыр.

Алдын ала деректерге сәйкес, Сұлтан Сарсемалиев жұбайымен бірге шетелде болуы мүмкін. Тергеу олардың Бали аралында жасырынғанын жоққа шығармайды. Қазіргі уақытта олардың кәмелетке толмаған бес баласына күдіктінің анасы қарап отыр.

Бұған дейін отбасының үйіндегі қорадан Мақсот Қарабалин мен Нәсіп Өтешқалиеваның мәйіттері табылған еді. Ал Ақбаянның бауыры Наурыз бен әпкесі Мирамгүл әлі күнге дейін іздестірілуде. Олардың қайда екені әлі анықталмай отыр.

Кеше жоғалған отбасының туыстары Атырау облыстық полиция департаментінің ғимаратына келді. Олардың айтуынша, тергеу барысы туралы ресми ақпарат кешігіп беріледі, ал көптеген деректерді әлеуметтік желілер арқылы біледі екен.

Туыстар тергеудің ашық жүргізілуін және іздестіру мен тергеу шараларының нәтижелері туралы тұрақты хабардар етіліп отыруын талап етуде.

Тергеу органдары іс бойынша жұмыстардың жалғасып жатқанын хабарлады.

Айнұр САПАРОВА

Бүгін, 10:57