Жапония Азия елдеріне мұнай сатып алуға $10 млрд бөледі

Бұл шешім аймақ елдерінің, соның ішінде Оңтүстік-Шығыс Азия мемлекеттері қауымдастығына (АСЕАН) мүше мемлекеттердің қатысуымен өткен онлайн кездесуден кейін жарияланды. Бөлінетін қаражат энергетикалық жеткізілім тізбегін нығайтуға бағытталады. Атап айтқанда, мұнай мен мұнай өнімдерін сатып алуға несие беру, сондай-ақ стратегиялық қорларды ұлғайту шаралары қарастырылған. Токионың бағалауынша, бұл көмек көлемі шамамен 1,2 млрд баррель мұнайға тең, бұл АСЕАН елдерінің бір жылдық импортымен шамалас.

Санаэ Такаитидің айтуынша, Жапония экономикасы Азия нарықтарымен тығыз байланысты, сондықтан өңірдегі мұнай жеткізіліміндегі кез келген іркіліс елдің өнеркәсібі мен әлеуметтік саласына елеулі әсер етуі мүмкін. Әсіресе Ормуз бұғазы төңірегіндегі ахуал алаңдаушылық туғызып отыр. Осы бағыттағы жеткізілімдердің бұзылуы мұнай бағасының өсуіне әкеліп, импортқа тәуелді Азия елдеріне қысымды күшейтті.

Қаржылай қолдау, соның ішінде, Жапония халықаралық ынтымақтастық банкі арқылы көрсетіледі. Сонымен қатар бағдарлама ұлттық мұнай қорларынан тікелей жеткізілімді қарастырмайтыны және елдің ішкі энергетикалық қауіпсіздігіне әсер етпейтіні белгілі болды.

Бұған дейін Жапония 16 наурыздан бастап бензин мен басқа да мұнай өнімдері бағасының күрт өсу қаупіне байланысты мұнай қорларын қысқарта бастағаны хабарланды.