Жаркент мешіті ЮНЕСКО ның бүкіләлемдік мұра нысандарының алдын ала тізіміне енгізілді

Мемлекет басшысының Ұлттық құрылтайдың Қызылорда қаласында өткен бесінші отырысында берген тапсырмасын орындау аясында Жаркент мешіті және Вознесенск шіркеуі ЮНЕСКО-ның бүкіләлемдік мұра нысандарының алдын ала тізіміне енгізілді. Бұл туралы «Facebook» әлеуметтік желісіндегі парақшасында Мемлекеттік кеңесші Ерлан Қарин мәлімдеді, – деп хабарлайды Aikyn.kz.

- Жаркент мешіті ХІХ ғасыр соңындағы діни сәулет өнерінің бірегей ескерткіші саналады. Сонымен қатар, оны ислам сәулет дәстүрі мен Шығыс Азия құрылыс өнері синтезінің жарқын мысалы деуге болады.
Инженерлік және көркемдік әдіс-тәсілдерімен танымал болған Вознесенск шіркеуі – ХХ ғасырдың басындағы православ ағаш сәулет өнерінің озық үлгісі.
Бұл нысандардың тізімге бірге ұсынылуы Қазақстанда мәдени әралуандықтың бар екенін аңғартады. Сондай-ақ, Орталық Азия аймағында ислам және христиан дәстүрлерінің үйлесімді түрде қатар дамығанын, бір-біріне ықпал етудің тарихи тәжірибесі қалыптасқанын көрсетеді. Мешіт пен шіркеудің алдын ала тізімге енгізілуі – Қазақстанның мәдени мұраларын сақтау және оларды дәріптеу ісінің маңызды кезеңі. Бұл қадам ЮНЕСКО-ның рәсімдері мен талаптарына сәйкес номинация құжаттарын әзірлеуге негіз болады, - деп жазды Ерлан Қарин өзінің «Facebook» парақшасында. 

Еске салайық, Жаркент мешіті – XIX ғасырдағы сәулет ескерткіші. Мешіт 1895 жылы қытайлық сәулетші Хон Пикенің жобасы бойынша салынған. 1982 жылдан бері республикалық маңызы бар тарихи және сәулет ескерткіші ретінде мемлекет қорғауына алынған. Ғимарат Орта Азияның сәулет үлгісінде тұрғызылғанымен, будда ғибадатханасының элементтері де қолданылған. Бағандар мен басқа да ағаш бөлшектерін құрастыру кезінде шеге пайдаланылмаған. «Жаркент мешіті» сәулет-көркемөнер музейі Жетісу облысы Панфилов ауданының Жаркент қаласында орналасқан.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.