Жасанды интеллект 800 млрд теңгеге жуық қаржыны үнемдеп берді министрлік

АСТАНА, 14 қазан – Sputnik. Жасанды интеллект 781 млрд теңгені үнемдеуге мүмкіндік берді. Бұл туралы қаржы министрі Мәди Такиев мәлімдеді, деп хабарлайды Sputnik Қазақстан тілшісі.

Қазіргі кезде мемлекеттік сатып алулар саласына жасанды интеллект элементтері енгізіліп жатыр. Атап айтқанда, конкурстар рейтингтік-балдық жүйе негізінде өткізіледі. Ал конкурстық комиссия құрылмайды, жеңімпаз автоматты түрде таңдалады.

"Бүгінде үнемделген қаражат көлемі 781 млрд теңгені құрады", - деді Такиев үкіметтің бүгінгі отырысында.

Осы орайда министр биылдан бастап мемлекеттік сатып алуларға қатысты жаңа заңның күшіне енгенін еске салды. Онда сатып алу рәсімдерінің мерзімдерін қысқартуға басымдық берілген.

"Бүгінгі күні мерзімдер ең төменгі деңгейге дейін қысқартылып, отандық тауар өндірушілерді қолдауға бағытталған ережелер енгізілді", - деді Такиев.

9 айдың қорытындысы:

жасалған шарттар сомасы мен отандық тауар өндірушілерден сатып алу сомасы 2 есеге өсті;

шағымдар саны 25%-ға қысқарды;

жасалған шарттар саны 28%-ға, оның ішінде отандық тауар өндірушілермен жасалған шарттар саны 30%-ға өсті.