Жетісайда жер үй өртеніп, 12 адам, оның ішінде 9 бала тірідей жанып кетті

Президент Қасым-Жомарт Тоқаев Түркістан облысы Жетісай ауданындағы жеке үйде болған өрттің салдарынан көптеген адамның қаза табуына байланысты көңіл айтты, – деп хабарлайды Aikyn.kz. 

Президенттің Кеңесшісі – Баспасөз хатшысы Руслан Желдібайдың мәліметінше, Қасым-Жомарт Тоқаев Үкімет пен Түркістан облысының әкіміне зардап шеккен азаматтардың туған-туыстарына барлық қажетті көмек көрсетіп, қайғылы оқиғаны жан-жақты тексеруді тапсырды.

Бүгін таңертең Түркістан облысы Жетісай ауданы Алғабас ауылында орналасқан екі қабатты жеке тұрғын үйде өрт шыққан.

Өрт сөндіру бөлімі оқиға орнына жеткен кезде тұрғын үйдің толықтай өртке оранғаны анықталды.

– Өртті барлау және сөндіру барысында үйдің ішінен ес-түссіз күйдегі үш адам эвакуацияланып, жедел медициналық жәрдем бригадасына тапсырылды. Үйдің ішінен тоғыз баланы қоса алғанда, барлығы 12 адамның денесі табылды, – деп мәлімдеді ТЖМ.

Көршілердің айтуынша, алдыңғы күні үй иелері іс-шара өткізген, үйде қонақтар болған.
Өрт 360 шаршы метр аумақта толықтай сөндірілді.

Оқиға орнында барлық жедел қызметтер жұмыс істеп жатыр. Тергеу басталды, өрттің шығу себептері анықталуда.