Жетісу облысында 126 ауыл табиғи газға қосылды

Қақаған қыста от тұтатып, пеш жағып жүрмей, жайлы үйде қолыңды жылы суға малып отырғанға не жетсін! Ауылдағы ағайынның арманы осы.

Дегенмен оған жеткен де бар, жетпеген де бар. Жетісу облысында 3 жыл бұрын, небәрі 5 елді мекен табиғи газ тұтынатын еді. Қазір 126 ауылға көгілдір отын барып тұр. 

Облыста 2025 жылы 42 елдімекен табиғи газға қосылды. Көгілдір отын мыңға тарта тұрғыны бар Ескелді ауданындағы Қайнарлы ауылына да жетті.

Гүлім Тобықбаева, ауыл тұрғыны:

- Өзім отынды дайындатып қойып, өзіміз үйге кіргізетінбіз. Оған қарағанда газым келді. Енді көмір де тасымаймын, отын да жақпаймын. Күлін де тасымаймын.

Өңірде ұзындығы 300 шақырымнан асатын «Талдықорған-Үшарал» магистральді газ құбыры тартылды. Мерзімінен бұрын аяқталған жоба 120 мыңнан аса адам тұратын Ақсу, Сарқан және Алакөл аудандарын көгілдір отынмен қамтуға мүмкіндік береді.

Қоңыржай Қысталасова, ауыл тұрғыны:

- Біздің аудан ең алыс аудан. Қашан біздің ауыл көгілдір отынға қосылады деп, әр үйде қашан жылу болады деп халық үміттеніп жүрді. Енді бүгінгі күнде айтады ғой, «ақ түйенің қарны жарылды» - деп. Енді cол қуанышқа бәріміз ризамыз.

Енді сала жауаптылары негізгі магистральдан ауылдарға газ құбырын тарту және ішкі желілерді жүргізу үшін тиісті құжаттарды әзірлеп жатыр.

Айдос Бекетаев, облыстық Энергетика және ТҮКШ басқармасының басшысы:

- 84 елді мекенге жобалау сметалық жұмыстары жүргізіліп жатыр. Мемлекет сараптамасын алған соң құрылыс жұмыстарын бастаймыз. 2027 жылдың соңына дейін соны бітірсек, өңіріміздің 210 елді мекені газдандырылатын болады. Бұл бізде 94 пайызды құрайды.

Облыста табиғи газға сұраныс артып, тұтыну көлемі де көбейіп келеді. Сондықтан «Алматы-Талдықорған» бағытында тағы бір магистральді құбыр тарту жоспарланып отыр.

Авторлары: Шыңғыс Қалиден, Жеңіс Әбдірешов