Жетісу облысында көлік жүргізуге қарсы көрсетілімі бар 58 азамат рөлге отырған

АСТАНА, 13 шілде – Sputnik. Жетісу облысында прокуратура медициналық қарсы көрсетілімдері бар азаматтардың көлік құралын басқару құқығын тоқтату бойынша сотқа арыз жолдады.

Талдықорған қаласының прокуратурасы прокурорлық қадағалау актісі негізінде денсаулық жағдайына байланысты көлік құралдарын басқаруға медициналық қарсы көрсетілімдері бар азаматтардың жүргізуші куәліктерінің қолданысын тоқтату арқылы жол қозғалысы қауіпсіздігін қамтамасыз ету жөнінде жұмыс ұйымдастырды.

"Атап айтқанда, диспансерлік есепте тұрған, эпилепсиямен, психикалық бұзылыстармен, сондай-ақ психоактивті заттарды қолдануға байланысты психикалық және мінез-құлықтық бұзылыстармен ауыратын, көлік құралдарын қауіпсіз басқаруға кедергі келтіретін тұлғалар туралы болып отыр. Жүргізілген талдау нәтижесінде медициналық қарсы көрсетілімдері бола тұра көлік құралдарын басқаруды жалғастырып жүрген 58 азамат анықталды", - дейді прокуратура.

Анықталған заң бұзушылықтарды жою мақсатында прокуратура тарапынан сотқа көлік құралдарын басқару құқығын тоқтату және жүргізуші куәліктерін жарамсыз деп тану туралы талап арыздар жолданды.

"Бүгінгі таңда сот 28 талап арызды қанағаттандырды. Қалған 30 азаматқа қатысты материалдар сот қарауында", - дейді прокуратура.

Жетісу облысының прокуратурасы қабылданып жатқан шаралар жол қозғалысына қатысушылардың қауіпсіздігін қамтамасыз етуге және ықтимал жол-көлік оқиғаларының алдын алуға бағытталғанын атап өтті.