Жетісу облысында заңсыз ет тасымалдау деректері анықталды

Өңір аумағында «Мал ұрлығы» республикалық жедел алдын алу іс-шарасы өтіп жатыр. Оның мақсаты – мал ұрлығына байланысты қылмыстардың алдын алу, оларды ашу және ет пен ет өнімдерін тасымалдау мен сату кезінде құқық бұзушылықтарды анықтау.

Бар болғаны екі күннің ішінде полицейлер мал ұрлығына қатысты екі қылмыстық істі тіркеп, бұған дейін ашылмаған төрт қылмысты әшкереледі. Бұл нәтижелер іс-шараның тиімділігін көрсетіп, тәртіп сақшыларының ауыл тұрғындары мен шаруа қожалықтарының мүддесін қорғауға жауапкершілікпен қарайтынын дәлелдейді.

Профилактикалық іс-шара аясында ет және ет өнімдері сатылатын 69 нысан мен ет тасымалдаған 83 көлік тексерілді. Соның нәтижесінде тиісті құжаттарсыз өнім тасымалдаудың бес дерегі және ветеринариялық ережелерді бұзудың 43 жағдайы анықталды.

Бұдан бөлек, полиция қызметкерлері 138 шаруа қожалығын тексерді. Солардың бірі – Мақаншы – Алматы бағытындағы тасжолда тоқтатылған жолаушылар автобусы. Көлік Абай облысынан шыққан. Тексеру кезінде жүк бөлімінен 100 ұсақ және 2 ірі қара малдың еті табылды. Жүргізуші етті Алматы қаласындағы базарлардың біріне жеткізуге алғанын айтқан.

Аталған дерек бойынша материал ветеринариялық инспекцияға жолданды.

Полицейлер «Мал ұрлығы» іс-шарасы аясында тексерістерді жалғастырып, азаматтарды ет және ет өнімдерін тасымалдау мен сату кезінде заң талаптарын қатаң сақтауға, сондай-ақ мал ұрлығына қатысты күмәнді жағдайлар туралы полицияға дереу хабарлауға шақырады.

Айта кетейік, биыл Ұлытау облысы аумағында мал ұрлығы 30%-ға төмендеген.