ЖИ дәуіріне беталыс: Digital Qazaqstan 2026 да ірі технологиялық жобалар таныстырылды

Digital Qazaqstan 2026 форумында Қазақстанның цифрлық индустриясындағы жаңа жобалар мен бастамалар кеңінен таныстырылды.
Шара Еуразиялық үкіметаралық кеңес отырысымен қатар өтіп, оған ЕАЭО елдерінің үкімет басшылары мен делегация мүшелері қатысты.

Көрмеде стартаптар мен IT-компаниялардың әзірлемелері, робототехника, жасанды интеллект негізіндегі дрондар, GameDev бағыттары және AI Talent Hub алаңдары ұсынылды. Бұл жобалар Қазақстанның біртұтас цифрлық экожүйе қалыптастыруға бағытталғанын көрсетті.

Дмитрий Мун форум барысында AlemGPT мультиагенттік платформасын таныстырды. Бұл жүйе 35 мемлекеттік қызметті қамтып, азаматтармен өзара іс-қимылды жеңілдетуге бағытталған. Сонымен қатар Ұлттық жасанды интеллект платформасын әзірлеу жоспары да жария етілді.

Цифрлық инфрақұрылым бағытында дата-орталықтар мен энергетика жобалары ұсынылды. Қазақтелеком басшысы Бағдат Мусин «ДӨА алқабы» жобасын таныстырып, қуаты 50 МВт болатын жасанды интеллектке арналған дата-орталықтарды іске қосу жоспарын жариялады.

Қалалық инфрақұрылым бойынша Шымкент әкімдігі ITS интеллектуалды көлік жүйесін, мектептердің цифрлық қауіпсіздігін және қоғамдық қауіпсіздікке арналған дрон инфрақұрылымын көрсетті.

Финтех пен білім беру саласында Freedom Holding Corp ерекше жобалар ұсынды. Компания басшысы Тимур Турлов педагогтарға ChatGPT Edu қолжетімділігін қамтамасыз ету жөніндегі бастаманы жариялап, жасанды интеллектіні бизнес пен күнделікті сервистерге енгізу бағыттарын таныстырды.

Энергетика саласында Alageum Electric Smart Grid жүйелерін ұсынды. Бұл шешімдер энергия жүйесін толық цифрландырып, техникалық шығындарды 30%-ға дейін азайтуға мүмкіндік береді.

Сонымен қатар, ЕЭК өкілі Варос Симонян трансшекаралық электрондық құжат айналымын дамыту туралы бастама көтерді. Бұл жүйе электрондық цифрлық қолтаңбаны нақты уақытта тексеруге мүмкіндік береді.

Форум аясында AI Startify Incubator, Auezov AI First, Ushqyn AI Operator, AIJan және CortexAI сияқты стартаптар да таныстырылды. Жалпы, ұсынылған жобалар Қазақстанда жасанды интеллектке негізделген толыққанды цифрлық экожүйе қалыптасып келе жатқанын көрсетті.