Жүк көліктері қатаң бақылауға алынды

Шымкентте шамадан тыс жүк артып жолға шығатындар азаймай тұр.

Ауыр жүктерді таситын автокөліктер шаһардағы жолдарды бүлдіріп жатыр. Енді бұл мәселе жаңа технология арқасында шешімін табады. Мегаполисте автоматтандырылған өлшеу жүйелері сынақ режимінде іске қосылды. 

Ауыр салмақ – ауыр зардап. Жолға түсетін шамадан тыс салмақ асфальт жамылғысын кепіл мерзіміне дейін жарамсыз етеді. «Сондықтан жүк көліктердің салмағы нормадан аспаса, жолдың бүлінуін алдын алуға да сеп болады», - дейді мамандар. 

Ернарбек Мәмет, «Жол активтері ұлттық сапа орталығы» ҚФ инженері:

- Ол жүктер біздің қаламызда 13 тоннадан аспауы керек әрбір оське. Мысалы біздің жүк көліктеріміз 40 тонна, 25 тонна аралығында және одан аса жүк артуына байланысты осындай ақауларға алып келіп жатыр. 

Нұрсұлтан Мұхамеджан, тілші:

- Автоматтандырылған таразылау бекеті қаланың оңтүстік-шығыс беткейіне орнатылды. Енді мұнда жүк көліктерінің жолға түсіретін жүктемесі адам қатысуынсыз өлшенетін болады. Ережеге бағынбаған жүргізушілердің мемлекеттік нөмірі бірден тіркеліп, айыппұл салынады. 

Ақылды жүйе жолға түскен жүктемені қозғалыс кезінде дәлме-дәл анықтайды. Сынақ режимінде 3,5 мыңнан астам заңбұзушылық есепке алынды. Бірақ оларға айыппұл салынбайды. Ал 15 қазаннан бастап жағдай басқаша болады. 

Өмір Қалыбаев, жолаушылар көлігі және автомобиль жолдары басқармасы басшысының орынбасары:

- Қыркүйек айының соңғы онкүндігін бақылағанымызда Жібек жолы көшесінде 1600 тіркелді. Ауыр салмақ көліктері шамадан тыс өткен жүк көліктері тіркелді. Бердіқожа батырында 1200, осы есеппен-ақ біздің жолымыздың қалай тозып жатқанын көруге болады.  

Кешен сынақ кезінде тиімділігін көрсетті. Жалпы жобаға 950 миллион теңге бөлініп, тағы 6 автоматтандырылған таразылау бекеті салынады. Жоспар бойынша келер жылы солтүстік қақпадағы күрежол мен айналма бағыттар да қамтылады. 

Нұрсұлтан Мұхамеджан, Нұрмахан Бекмұратов, Нұрмахан Мұсатов