Жылдық инфляция 12,2% ға дейін баяулады

АСТАНА, 2 ақпан – Sputnik. Ұлттық статистика бюросының дерегіне сәйкес, 2026 жылдың қаңтарында Қазақстанда жылдық инфляция 12,2% деңгейінде болды.

Салыстыру үшін айтсақ, 2025 жылдың желтоқсанында бұл көрсеткіш 12,3% болған. Осылайша, бір ай ішінде инфляция 0,1 пайызға төмендеген.

Жыл ішінде азық-түлік бағасы 12,9%-ға өсті (2025 жылғы желтоқсанда – 13,5%). Ақылы қызметтердің бағасы 12%, ал азық-түлікке жатпайтын тауарлар 11,7% қымбаттаған.

Өңірлер арасында жылдық инфляцияның ең жоғары деңгейі Солтүстік Қазақстан облысында тіркелді – 14,3%. Ал ең төмен көрсеткіш Қостанай, Жамбыл, Батыс Қазақстан және Абай облыстарында байқалды – 11,5%.

Жылдық инфляция деңгейіне азық-түлік пен алкогольсіз сусындар, сондай-ақ көлік, киім-кешек және өзге де тауарлар ең көп үлес қосты.

Қаңтар айында азық-түлік инфляциясының көрсеткіші өткен жылмен салыстырғанда төмен болды. Дегенмен кейбір өнімдер қымбаттады. Атап айтқанда, ет пен құс еті 23%, алкогольсіз сусындар 16,8%, ал қышқыл сүт өнімдері 11,5% қымбаттаған.