Жылыой ауданының дәрігерлері алғашқы күрделі отаны сәтті жасап шықты

Жылыой аудандық ауруханасына түскен тоғыз жасар балаға оң жақ жіліншік сүйектерінің ортаңғы үштен бір бөлігі ығысып, ішінен бірнеше жерден сынған деген диагноз қойылды.

Науқасқа ота жасаған кезде дәрігерлер жабық интрамедуллярлық остеосинтез әдісін сәтті қолданды. Ота барысында сынған сүйек бөліктеріне эластикалық TEN штифтері мен Киршнер сымы пайдаланылған. Бұл әдіс — аз инвазивті, яғни үлкен тілік салмай, сүйектің ішкі өзегіне арнайы құралдар арқылы бекіту тәсілі. Нәтижесінде баланың жарақаты аз болып, қалпына келу уақыты әлдеқайда қысқарды.

Бұрын мұндай жарақаттармен облыстық немесе республикалық деңгейдегі ауруханаларға жүгінуге тура келсе, енді осындай жоғары технологиялы оталар аудан деңгейінде де жасалып жатыр. Ота жасаған Ізімов Әбілхайыр Болатұлы және Хұсанов Нұрдәулет Нұржанұлы.

Бүгінде бұл әдіс Жылыой аудандық ауруханасында балаларға тұрақты түрде сәтті қолданылып келеді. Қазір аудан дәрігерлері өз кәсібилігі мен тәжірибесін арттыра отырып, өңір тұрғындарына жоғары сапалы медициналық көмек көрсетіп жатыр.

Ләззат ҚАРАЖАНОВА 

Бүгін, 10:55