1 сәуірден бастап Атырауда жылу тарифі өседі

Бұл жолғы монополистердің «сыйлығы» ең көп тұтынушы саналатын жеке тұлғалардың қалтасына әсер етпейді деп мәлімделуде.

Әлеуметтік желілерде «Атырау жылу жүйелері» (АЖЖ) ЖШС үшін жылу энергиясын беру, бөлу және сату бойынша жаңа шекті тариф бекітілгені туралы ақпарат тарады. Бұл хабарлама жалпы бағалар қымбаттап, халықтың сатып алу қабілеті төмендеп, кейбір супермаркеттерде сөрелер босап қалған кезбен тұспа-тұс келіп, қала тұрғындарының наразылығын туғызды. Олардың кейбірі тарифті бекіту рәсімінің заңдылығына күмән келтіріп, қоғамдық тыңдаулар өткізілмегенін айтты.

Атырау облысы бойынша Табиғи монополияларды реттеу комитетінің департаменті хабарлағандай, «Атырау жылу жүйелері» ЖШС жаңа тарифті бекітуге өтінімді 2025 жылдың шілдесінде берген, себебі бұрынғы тарифтің бесжылдық мерзімі аяқталған. Қоғамдық тыңдаулар алдын ала хабарландырулар комитеттің сайтында, департаменттің Facebook парақшасында және екі мемлекеттік БАҚ-та жарияланғаннан кейін 17 қазанда өткізілген.

"АЖ" сауалына департамент басшысы Арман Өтегеновтің қолы қойылған жауапта: «Нәтижесінде департаменттің бұйрығымен «Атырау жылу жүйелері» ЖШС-нің жылу энергиясын беру және тарату бойынша реттелетін қызметке тариф 11 913,56 теңге/Гкал (ҚҚС-сыз) мөлшерінде бекітілді, бұл бұрынғы бекітілген тарифтен 9,42% (1025,82 теңге) жоғары», – делінген. Жаңа тариф 2026 жылдың 1 сәуірінен бастап бес жыл мерзімге енгізіледі.

ТМРКД дерегінше, тарифтің өсуіне стратегиялық тауарлар бағасының қымбаттауы, өңірдегі орташа жалақының өсуі және 2026–2030 жылдарға арналған 6,2 млрд теңгеден асатын инвестициялық бағдарлама себеп болған. Бұған дейінгі бесжылдық бағдарлама 3,9 млрд теңгеге бағаланған еді.

«Сонымен қатар, халыққа (жеке тұлғаларға) жылу энергиясын сату бойынша реттелетін қызметке арналған тарифтер 2026 жылдың 1 сәуірінен бастап өзгеріссіз қалады және көтерілмейді. Аталмыш кезеңде жеке тұлғалар тұтынған жылу энергиясы үшін есептеулер 2026 жылдың I тоқсанында қолданылған бекітілген тарифтер бойынша жүргізіледі», – делінген ведомствоның хатында.

Департаменттің мәлімдеуінше, тарифтің өсуі «Qazaqgaz Aimaq» АҚ-ның «Теңізшевройлдан» Атырау ЖЭО-ға газ жеткізудегі делдал рөліне байланысты емес. Бұл мәселе бойынша түпкілікті шешім әлі қабылданған жоқ.

Еске сала кетейік, 1 қаңтардан бастап газ және энергетика компаниялары жаңа Салық кодексіне сәйкес ҚҚС мөлшерлемесінің 12%-дан 16%-ға өсуіне байланысты өз қызметтерінің бағасын көтерген болатын.

Лев ГУЗИКОВ

Бүгін, 16:36