Түркияда 1 сәуірден бастап 5G желісі коммерциялық пайдалануға беріледі

5G желісінің іске қосылатыны туралы Түркияның Көлік және инфрақұрылым министрі Абдулкадир Уралоглу мәлімдеді. Оның айтуынша, жаңа технология деректерді беру жылдамдығын айтарлықтай арттырып, 20 Гбит/с-қа дейін жеткізуге мүмкіндік береді.

Министрдің сөзінше, 23 ақпанда Түркияда алғашқы ұялы телефон қоңырауы шалынғанына 22 жыл толды. Тарихи әңгіме 1994 жылы сол кездегі премьер-министр Тансу Чиллер мен президент Сүлейман Демирел арасында өткен. Содан бері ел бірінші және екінші буын желілерінен 4G және 5G стандарттарына дейінгі жолдан өтті.

5G технологиясын енгізуге арналған лицензияларды 2025 жылғы қазанда өткен жиілік аукционының қорытындысы бойынша елдің үш ірі мобильді операторы алды. Сонымен қатар инфрақұрылымды дамыту жұмыстары да қатар жүргізілді. Түркиядағы талшықты-оптикалық желілердің жалпы ұзындығы 657 мың шақырымға жетті.

Қазіргі таңда елде 99 миллионнан астам мобильді абонент бар. Оның ішінде 91 миллионы 4,5G желісін пайдаланады.

Мамандардың айтуынша, 5G енгізілуі онлайн-ойындар, телемедицина, оның ішінде қашықтан жасалатын операциялар сияқты салалардың дамуына серпін береді. Сондай-ақ экономиканы және мемлекеттік қызметтерді цифрлық трансформациялауды жеделдетеді.

Бұған дейін Түркияда әлеуметтік желілерге қатысты талап күшейіп жатқаны хабарланған болатын.