1,1 млрд теңгеге автокөліктерді бақылау жүйесі орнатылмақ

Техникалық сипаттамаға сәйкес, жоба жай ғана камера орнату емес, кешенді жүйе құруды көздейді. Жүйеде спутниктік және мобильді байланыс, мемлекеттік нөмірлерді тану, инспекторлардың әрекеттерін тіркеу және оқиғаларды автоматты талдау функциялары қарастырылған.

Жүйе 2028 жылдың соңына дейін жұмыс істеуі тиіс.

Нақты не сатып алады

Жоба Қазақстанның барлық өңіріндегі 53 стационарлық және жылжымалы көліктік бақылау бекетін қамтиды.

Жеткізушіге қойылатын талаптар:

• Бекеттер мен қызметтік көліктерді тәулік бойы бақылау;
• 4G/5G мобильді желілер және спутниктік интернет арқылы бейнежазбаларды онлайн жіберу;
• Мемлекеттік нөмірлерді нақты уақытта тану;
• Инспекторлардың әрекеттерін тіркеу үшін бейнежазбаларды пайдалану;
• Видео деректерді 6 ай бойы сақтау;
• Жасанды интеллект арқылы оқиғаларды автоматты тіркеп, талдау.

Әр жылжымалы бекет бірнеше ішкі және сыртқы бейнекамералармен, 30 есе оптикалық зумға ие PTZ-камерамен, видеорегистратор, GPS-модуль, автономды қуат көздері, күн панельдері және спутниктік терминалмен жабдықталады.

Спутниктік интернет — басты шығын көзі

Жобаның ең қымбат шығынының бірі — спутниктік байланыс. Ел бойынша 50 спутниктік терминал орнату жоспарланған, әрқайсысы айына кемінде 1 ТБ интернет-трафикті қамтамасыз етуі тиіс.

Серверлер, деректерді сақтау және қауіпсіздік

Жоба аясында бейнежазбаларды сақтау және өңдеу үшін серверлік инфрақұрылым құрылады:
• Бейнекамералар үшін кемінде 80 ТБ сақтау жүйесі;
• Бейнежетондарды тіркеу үшін бөлек 50 ТБ сақтау орны;
• Нөмірлерді тану және деректерді талдау серверлері;
• Резервтік қуат көздері және жүйенің ақауға төзімділігі.
Бағдарламалық қамтамасыз ету ҚР ақпараттық қауіпсіздік талаптарына сай аттестатталуы керек және мемлекеттік деректер базасымен интеграциялануы тиіс.

Қызмет көрсету және қолдау

Техникалық сипаттамада жабдықты қызмет көрсетуге қойылатын талаптар бөлек көрсетілген:
• Астанада тәулік бойы жұмыс істейтін қолдау қызметі;
• Барлық өңірде аймақтық мамандар;
• Қашықтыққа байланысты 18-36 сағат ішінде нысанға шығу мүмкіндігі;
• Жабдыққа жүйелі түрде техникалық қызмет көрсету;
• Тәулік бойы өтініштерді тіркейтін арнайы жүйе (Service Desk).

Бұған дейін ақылы автожолдарда сараланған төлем енгізу ұсынылғаны жайлы жазған едік.