112 жіберетін хабарламаларға неліктен назар аудару керек?

Дауылды ескерту – бұл қауіпсіздіктің сана мен дайындықтан басталатынын еске салатын маңызды сигнал. Уақытында қабылданған сақтық шаралары жарақаттанудың алдын алуға, зақымдануды азайтуға және адамдар мен инфрақұрылым нысандарын қорғауды қамтамасыз етуге мүмкіндік береді, деп жазады Egemen.kz.

– «60 секундтық қауіпсіздік» жобасы дауылды ескертулердің маңыздылығы мен ауа райының қолайсыз жағдайына алдын ала дайындалу қажеттілігі туралы қысқаша шолу жасады. Оның мақсаты – қауіпті ауа райы құбылыстары кезінде әр адамның қауіпсіздігін сақтауға көмектесетін қарапайым, бірақ өмірлік маңызды ережелерді еске салу.

112 қызметі жіберген жедел хабарламалар алдағы ауа райы, қауіп-қатер туралы уақытында білуге және қажетті шараларды қабылдауға мүмкіндік береді. Ауа райы жағдайының күрт нашарлауы туралы ақпарат алған кезде әрекет ету тәртібін білу маңызды, – деп ескертті ТЖМ.

Ведомство азаматтарды ресми ескертулерге мұқият назар аударуға, 112 қызметінен келетін хабарламаларды үнемі тексеруге және ауа райының мүмкін өзгерістеріне алдын ала дайындалуға шақырады.