2025 жылғы ауыз сумен қамту жоспары орындалды

Былтыр еліміздегі 90 қала мен 7,5 млн тұрғыны бар алты мыңнан астам ауыл ауыз сумен толық қамтамасыз етілді.

Осылайша 2025 жылдың соңына дейін халықты ауыз сумен қамтамасыз ету жөніндегі Президенттің тапсырмасы толық орындалды. Бұл туралы өнеркәсіп және құрылыс вице-министрі Қуандық Қажкенов баяндады. Құзырлы орган басшысының айтуынша, бұл мақсатқа республикалық бюджеттен шамамен 835 млрд теңге бөлінген, оның 132 млрд теңгесі қайтарылған активтер есебінен алыныпты. 

Бақыт Топтаева, тілші:

- Биыл Қазақстанда үш мыңдай шақырымға созылатын су бұру жүйесі жаңғыртылады. Сондай-ақ 5 мың шақырым су құбырының желілері мен кәріз-тазарту жүйесі күрделі жөндеуден өтеді. Өнеркәсіп және құрылыс вице-министрі Қуандық Қажкеновтың айтуынша, Энергетика мен коммуналдық секторды жаңғыртуға арналған ұлттық жоба аясында бұл жұмыстарға екі трлн теңгеге жуық  инвестиция тартылмақ. 45 қалада кәріз-тазарту құрылыстарын жаңарту жоспарлануда. Осылайша 2030 жылға қарай сумен жабдықтау желілерінің тозу деңгейін 33%-ға, ал су бұру желілерін 41%-ға дейін төмендету жоспарланып отыр.

Қуандық Қажкенов, ҚР Өнеркәсіп және құрылыс вице-министрі:

- Жобаларды кешенді жоспарлау және бақылау үшін Техникалық оператор институты енгізілді. Оның басты қызметі – табиғи монополия субъектілерінің өтінімдерін қарау, жобалау кезінде қазақстандық өнімге басымдық беру, техникалық-технологиялық шешімдерді сараптау мен мониторинг жүргізу.

Алайда аталған институт тапсырыс берушілер мен әкімдіктердің функцияларын алмастырмайды және қайталамайтынын атай кету керек, керісінше техникалық-технологиялық шешімдердің сапасы мен тиімділігін қадағалайтын болады. Сонымен қатар қаржыландыру көзін анықтау және тарифті кепілдендіру үшін Қаржылық оператор институты енгізілді.

Бақыт Топтаева, тілші:

- Су ресурстары және ирригация министрі былтыр сумен жабдықтау нысандарын салу және реконструкциялау жоспарын асыра орындағанын мәлімдеді.  Нұржан Нұржігітовтың айтуынша, 9 өңірде сумен жабдықтау нысандарын салу мен жаңғыртудың 30 жобасы іске асырылды. Сөйтіп, Жыл қорытындысы бойынша жоспарланған 9 нысан орнына 15 нысан пайдалануға берілген.

Нұржан Нұржігітов, ҚР Су ресурстары және ирригация министрі:

- Нәтижесінде 1599 км сумен жабдықтау желісі және 8 су құбыры нысанының алаңы салынды. 277 елді мекенде тұратын 514 мың адам сапалы су жеткізу және сумен қамтуды жақсарту мүмкіндігіне ие болды.  

Бақыт Топтаева, тілші:

- Биыл су ресурстары және ирригация министрлігі 12 жобаны аяқтап, пайдалануға беруді жоспарлап отыр. Бұл жарты миллион халқы бар 142 ауылдық елді мекенді сапалы ауызсумен қамтамасыз етуге жол ашады. Сонымен қатар үш облыстағы 5 жоба бойынша жобалау-сметалық құжат әзірленіп жатыр. Бұл жобалар аясында ірі топтық су құбырларының құрылысын бастау көзделген. Осы ретте министрлер кабинетінің басшысы Олжас Бектенов елімізде су тұтыну көлемі де ұлғая беретінін атап өтіп, ауыз сумен қамтамасыз ету үздіксіз жүретін процесс екенін еске салды. Сондықтан барлық жауапты мемлекеттік органға бұл мәселені тұрақты бақылауда ұстауды тапсырды.

Бақыт Топтаева, Жандос Битабаров