2030 жылға дейін 42 су қоймасы салынып, су жинау көлемі 2,6 млрд текше метрге артады

Ведомствоның дерегінше, елімізде жыл сайын шамамен 25 млрд текше метр су тұтынылады. Оның 65%-ы ауыл шаруашылығына, 25%-ы өнеркәсіп саласына тиесілі.

Министрлік климаттың өзгеруі мен су ресурстарының азаюы жағдайында суды тиімді пайдалану мемлекеттік саясаттың басым бағытына айналғанын атап өтті.

- Осы мақсатта су шаруашылығы инфрақұрылымын жаңғырту және салу жұмыстары жүргізілуде. 2026 жылдың басынан бері шамамен 700 шақырым канал механикалық әдіспен тазартылған. Ал соңғы 2,5 жылда 3,5 мың шақырымнан астам канал тазаланған.

Бұдан бөлек, 1200 шақырым каналға реконструкция жұмыстары басталды. Оңтүстік өңірлерде 65 мың гектар жерді суаратын 103 канал автоматтандырылып жатыр. Сондай-ақ үнемделген қаражат есебінен ұзындығы 85,5 шақырым болатын 14 канал бетонмен қапталуда, - делінген ақпаратта.

Халықаралық қаржы институттарымен бірлескен жобалар да іске асырылуда. Еуропалық қайта құру және даму банкімен бірлескен 46 жоба аяқталып, 502 шақырым канал жаңғыртылды. Ислам даму банкінің қолдауымен жүзеге асырылып жатқан 9 жоба аясында жоспарланған 635 шақырымның шамамен 600 шақырымы реконструкциядан өтті.

- Сонымен қатар Батыс Қазақстан, Жамбыл және Қызылорда облыстарында үш су қоймасының құрылысы басталды. Түркістан облысында жалпы көлемі 69 млн текше метр болатын екі су қоймасы салынып жатыр.

Қолданыстағы су қоймаларын жаңғырту бойынша 7 жоба әзірленіп, тағы 7 облыстағы 11 нысанға қатысты жобалау жұмыстары жалғасуда. Бұған қоса Түркістан облысындағы Қапшағай, Батыс Қазақстан облысындағы Киров, Абай облысындағы Шар, Жетісу облысындағы Қызылағаш су қоймалары және Қостанай облысындағы «Албарбөгет» бөгеті реконструкцияланды, - деп жазды министрліктен.

Түркістан облысындағы Көксарай контрреттегішін және Жамбыл облысындағы «Қарақоңыз» су қоймасын жаңғырту, сондай-ақ сыйымдылығы 870 млн текше метр болатын Есіл контрреттегішін салу бойынша рәсімдер басталды.

Су ресурстарын басқару жүйесін дамыту тұжырымдамасына сәйкес, 2030 жылдың соңына дейін Қазақстанда 42 жаңа су қоймасын салу және 37 қолданыстағы нысанды реконструкциялау жоспарланған. Бұл шаралар ауыл шаруашылығын тұрақты сумен қамтамасыз етуге, су тасқыны қаупін азайтуға және трансшекаралық суға тәуелділікті төмендетуге мүмкіндік береді.

Сонымен қатар іске асырылатын жобалар жыл сайын қосымша 2,6 млрд текше метрге дейін су жинауға жағдай жасайды.

Айта кетейік, бұған дейін мемлекет бөгеттер мен су қоймаларының қауіпсіздігін қалай бақылайтыны хабарланды.