30 жылдан кейінгі кездесу: Ақтөбеде қарт ана балаларымен қауышты

Ақтөбе облысы Қарғалы ауданының Қосестек ауылында қызмет ететін учаскелік полиция инспекторы, полиция майоры Айболат Бекнияздың адалдығы мен қайырымдылығын жергілікті халық жақсы біледі.

Ауылдағы әрбір тұрғынды танитын тәртіп сақшысын ауылға көшіп келген сырқат қарияның жағдайы бейжай қалдырмаған. 72 жастағы Людмила Скрипниктің ешбір жақыны болмаған, өзімен бірге құжаттары да жоқ еді. Құжаттарын қандай жағдайда жоғалтқанын да қария есіне түсіре алмаған.

Учаскелік полиция инспекторы Айболат Бекнияз қарт әйелдің құжаттарын рәсімдеуге көмектесу үшін түрлі мекемелерге сұрау жолдай бастаған. Алғашында нәтиже болмағанымен, кейін мұрағаттан 30 жылдан астам уақыт бұрынғы құжат табылған.

Құжатта Людмила Скрипниктің үш баласы, бір ұл, екі қызы бар екені көрсетілген. Бұл дерекке қуанған полицей ізденісті жалғастырып, олардың бірін тауып, байланысқа шыққан.

– Телефон тұтқасын көтерген әйел адамнан «Людмила Скрипникті танисыз ба?» деп сұрағанымда, ол қатты толқып кетті. Өзінің көп жыл бұрын жоғалтқан анасы екенін айтты. Мән жайды түсіндірдім. Ол қарияның үш баласы да аман-сау екенін, бүгінде өз отбасыларымен Павлодар қаласында тұрып жатқанын, анасын ұзақ уақыт бойы іздегенін жеткізді. Қызы анасымен дереу сөйлестіруді өтінді, – деді Айболат Бекнияз.

Полицей қарияның үйіне барып, оны қуанышты жаңалыққа алдын ала дайындап, бейнебайланыс арқылы балаларымен сөйлестірген.

Перзенттері полиция қызметкерінен құжатсыз анасын өздеріне жеткізуге көмектесуді сұраған.

Балаларына баруға асыққанымен, қарияның денсаулығы ұзақ жолға жарамсыз болған. Осыған байланысты учаскелік инспектор ауыл дәрігерімен бірге оны бір айға жуық емдеген.

Сәуір айында денсаулығы жақсарған Людмила Скрипник таксимен Павлодар қаласына жөнелтілген.

Қазіргі уақытта қария балаларымен қауышып, немерелерінің ортасында өмір сүріп жатыр. Ол өзіне көмек көрсеткен полиция қызметкеріне алғысын білдірді.

– Менің қайғыма бейжай қарамай, көмек қолын созған жалғыз адам Айболат болды. Соңына дейін бірге болып, балаларымды тауып бергені үшін алғысым шексіз. Осындай мейірімді жандар көбейе берсе екен, – деді қария.

Балалары да анасымен қауыштырған учаскелік инспекторға алғыс айтып, оны қонаққа шақырып отыр.

Анықталғандай, осыдан 30 жыл бұрын Людмила Скрипник ауыр жағдайға тап болып, балаларынан ажыраған. Үш баласы алыс туыстарының қолында тәрбиеленген. Кейін сырқаттанған анасы басқа елде өмір сүріп, перзенттерін есіне түсіре алмағандықтан, оларды іздеп таба алмаған.

– Жалғызбасты қарияның отбасы табылғанына өзім де қатты қуандым. Тағдырдың талай сынына төтеп беріп, бүгінде әрқайсысы өз алдына отбасы болған қайсар, мейірімді балаларын көріп риза болдым, – деді Қосестек ауылының учаскелік инспекторы Айболат Мұратұлы.

Айта кетейік, былтыр Ресей азаматы араға 59 жыл салып Астанада анасымен қауышқанын жазғанбыз.