6,8 млрд теңге шығын келтірген: Абай облысында қаржы пирамидасы әшкере болды

Аталған облыс бойынша Қаржы мониторингі агенттігінің департаменті қаржы пирамидасының қызметін тоқтатты, деп хабарлайды Egemen.kz.

Фото: Depositphotos.com

Ұйымдастырушылар азаматтарға «HALYK QUATY» тұтыну кооперативіне кіруді ұсынып, тұрғын үй мен автокөлікті пайызсыз бөліп төлеуге алу үшін пай жарналарын салуға иландырған. Өз қызметін сайт пен әлеуметтік желілер арқылы жарнамалап, «Әр отбасына бақыт!» деген ұранмен «халықтық кооператив» бейнесін жасаған.

Аталған тұтыну кооперативі заңсыз пайдаланғаны үшін әкімшілік жауапкершілікке тартылғаннан кейін кооперативтің атауы «ELL QUATY» болып өзгертілген.

Жаңа салымшыларды тарту үшін басшылық түрлі маркетингтік акциялар ұйымдастырған, оның ішінде «Күншуақты Түркия» туристік жолдамаларын ұтысқа тігумен де айналысқан.

Қылмыстық кірістерді заңдастыру мақсатында ұйымдастырушы өз атына «QAZ INFO MARKET» ЖШС-ін тіркеп, шотына салымшылардың қаражатын (көрсетілмеген кәсіби, ғылыми және техникалық қызметтер үшін) аударып отырған.

 24.kz мәліметінше, пирамидаға  1,5 мыңнан астам салымшы тартылып, олар 6,8 млрд теңге салған.

Ұйымдастырушы қамауға алынды, тергеу жалғасып жатыр, өзге ақпарат жариялауға жатпайды.