Абай достық пен гуманизмнің жыршысы

24.KZ парақшасынан алынған деректерге сүйене отырып, Qazaq24.com хабарлама жасады..

«Ұлы ағартушы Абай Құнанбаев– достық пен гуманизмнің жыршысы». Өзбекстанның қазақтар көп шоғырланған Жоғарғы Шыршық ауданында осындай атаумен ерекше әдеби кеш өтті. Бұл шара Абай мұрасын дәріптеуге, рухани құндылықтарды нығайтуға бағытталған. Негізгі мақсат Қазақстан мен Өзбекстан арасындағы мәдени ынтымақтастықты дамыту.

Қандастарды Хакім Абайдың жырларымен сусындатуға ұлы ақын туып өскен Семей топырағынан бір топ өнер иесі арнайы келген. Олар жергілікті жұрттың ерекше ықыласына бөленді. Өлең-жыр оқып, қазақтың әндерін шырқаған қонақтарға жұрт толассыз қол соғып, ризашылық білдірді.

Бекзат Омашев, Семей музыкалық драма театрының әртісі:
- Бүгін міне, Өзбекстанға Абай атамыздың образын сомдап келе жатырмыз. Әсер керемет, бұл жердегі қазақ қандастарымыз құшақ жая қарсы алып жатыр, шын Абай атаны көргендей болдық деп толқып жатыр, барлығына рақмет!
Тамыз айында Ташкент шаһарында бастау алған мәдени шаралар легінен ауыл аймақтағы ағайын да шет қалмады. Қыркүйектен бері қазақ мәдени орталықтары мен мектептер ұлы ақынның 180 жылдығын атап өтуді жалғастырып келеді.

Дамир Қалдыбаев, Ташкент облыстық қазақ ұлттық мәдени орталығының төрағасы:
- Қазақ тілін сақтап қалу - біздің негізгі мақсатымыз, ол үшін жұмыстар жүргізіп жатырмыз. Ата-аналарға да түсіндіру шараларын алып барып жатырмыз. Халқымыздың амандығы, еліміздің тыныштығы керек. Халықтар достығы жалғаса берсін, Қазақстан мен Өзбекстанның достығы бұдан да нығая берсін.

Аршиддин Абдурохмонов, Юнусобод ауданының тұрғыны:
- Абай Құнанбаев — қазақ еліне ғана емес, барша түркі халықтарына ортақ тұлға. Түбі бір бауырлас елдерде Абайды білмейтін адам жоқ. Бала кезден ұлы ақынның жырларын жаттап өстік. Абай өлеңдері өміршеңдігін ешқашан жоғалтпайды. Жас ұрпақтың жадында жүретін мол әдеби мұра деп білемін.

Өзбекстандағы қандастар Абайды танып, оны насихаттау бағытындағы жұмыстарды жалғастыра бермек. Себебі Ұлы ақынның адамгершілікке, парасат пен білімге шақыратын терең философиялық мұрасы жас ұрпақтың толық адам болып қалыптасуына қызмет етері сөзсіз.

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.