Абай облысында 20 млн теңгеден астам шығынға себеп болған алаяқ ұсталды

Семей қаласында полиция 56 жастағы әйелді ұстады. Ол тұрғындарға «пәтер рәсімдеуге көмектесемін» деп сендіріп, ірі көлемде ақша алған. Нәтижесінде бірнеше адам қаржысынан айырылып, жалпы шығын 20 млн теңгеден асты. Бұл туралы POLISIA.KZ хабарлады.

Тергеу барысында белгілі болғандай, күдікті 2025 жылдың тамызында азаматтардың сеніміне кіріп, «пәтерді тез алып беремін» деген уәде айтқан. Жәбірленушілер оның банк шотына ақша аударған.

Мысалы, Үржар ауданының тұрғыны 8,5 млн теңге, Семей қаласының 55 жастағы тұрғыны 3,25 млн теңге, ал тағы бір семейлік азамат 9 млн теңге жоғалтқан.

Күдікті кінәсін мойындағанымен, ақшаны жеке қажетіне жұмсап жібергендіктен қаражатты қайтару мүмкін болмаған. Қазір ол уақытша ұстау изоляторына қамалды.

Полиция азаматтарға ескерту жасады: үй немесе басқа да қымбат мүлікті сатып алғанда тек ресми әрі сенімді ұйымдарға жүгіну керек. «Мәселені заңнан тыс шешіп беремін» деген ұсыныстар қаржылық шығынға және қылмыстық жауапкершілікке әкелуі мүмкін.

Бүгін, 14:23