Абзал Құспан: Әділетті Қазақстан адамды нақты қорғайтын Конституциядан басталады

Мәжіліс депутаты Абзал Құспан «AMANAT» партиясы фракциясының отырысында сөйлеген сөзінде жаңа Конституция жобасы құқықтық мемлекетті нығайтуға бағытталғанын және ол тек формалды декларациялармен шектелмей, азаматтардың құқықтарын қорғаудың нақты тетіктерін қамтамасыз етуі тиіс екенін атап өтті, - деп хабарлайды Aikyn.kz.

Сондай-ақ депутат жаңа Конституция жобасындағы негізгі жаңашылдықтардың бірі адвокатура институтын конституциялық деңгейде бекіту екенін айтты. Парламентарийдің пікірінше, бұл шешім адам құқықтарын қорғау жүйесін күшейтіп, құқықтық көмекті неғұрлым кепілді әрі тұрақты етеді.

Оның айтуынша, Конституция елдің басты саяси-құқықтық құжаты, ол жасына және әлеуметтік жағдайына қарамастан әрбір азаматтың өміріне тікелей әсер етеді.

Абзал Құспан жаңа Конституция жобасының негізінде Әділетті Қазақстанды құру, заң мен тәртіпті нығайту қағидаттары жатқанын еске салды. Алайда депутаттың айтуынша, бұл қағидаттар тек әдемі тұжырымдар ретінде ғана емес, азаматтардың құқықтары нақты тетіктер арқылы қамтамасыз етілетін іс жүзіндегі жүйе ретінде жұмыс істеуі қажет.

Ол сондай-ақ Конституция жобасындағы құқықтық өзгерістер жеке тұлғаның құқықтарын қорғау жөніндегі халықаралық стандарттарға, соның ішінде әлемдік тәжірибеде «Миранда құқығы» деп аталатын, адамның қорғауға және білікті заң көмегіне ие болу жөніндегі іргелі құқығын бекітетін тәсілдерге сай келетінін атап өтті.

«Адвокатура институтын Конституцияға енгізу Әділетті Қазақстан, заң мен тәртіп қағидаттарымен тікелей байланысты. Сонымен қатар бұл адам құқықтарын қорғаудың халықаралық деңгейде мойындалған стандарттарына, соның ішінде мемлекет адамның қорғану құқығын қамтамасыз етуге міндетті болатын “Миранда құқығына” толық сәйкес келеді»,- деді Абзал Құспан.

Оның айтуынша, адвокатура  құқықтық қорғау жүйесінің негізгі тіректерінің бірі. Өйткені дәл адвокаттар арқылы адамның әділ сот талқылауына, мүдделерін қорғауға және биліктің озбырлығына жол бермеуге деген құқығы іс жүзінде қамтамасыз етіледі.

«Егер Конституцияда әділеттілік пен заң қағидаттары бекітіліп, алайда адвокатура мәселесі шешілмесе, мұндай нормалар декларация деңгейінде қалып қою қаупі бар. Себебі адвокатура адам құқықтарын нақты өмірлік жағдайда шынайы қорғауға айналдыратын тетік», - деп атап өтті депутат.

Абзал Құспан адвокатураны конституциялық деңгейде бекіту азаматтардың құқықтық жүйеге деген сенімін арттырып, заң қағаз жүзінде ғана емес, шын мәнінде адамды қорғайтын құқықтық мемлекетті қалыптастыру жолындағы маңызды қадам болатынын айтты.