Агросекторды цифрландыру: Елде 300 ден аса қожалық smart технологияларды енгізді

Бұл туралы Ауыл шаруашылығы вице-министрі Ермек Кенжеханұлы Астанада өткен Орталық Азияның KazAgro/KazFarm-2025 ірі ауыл шаруашылығы көрмесінің ашылуында мәлімдеді. Вице-министрдің айтуынша, Қазақстан агросекторды цифрландыру жолында айтарлықтай күш салып жатыр.

— Елімізде 300-ден астам шаруа қожалығы smart-ферма элементін енгізді. Біз жасанды интеллект және «ақылды жер игеру» (жер игеруде GPS, спутник бейнелерін және дронды қолдану — ред.) технологияларын енгізіп жатырмыз. Олардың тиімділі жоғары және түсетін таза пайдасы әлдеқайда жоғары. Мемлекет және Үкімет ретінде біз осы технологияларды ауыл шаруашылығына тереңдете енгізу шараларын әрі қарай ынталандыруға дайынбыз, — деді ол.

Фото: Виктор Федюнин/Kazinform

Вице-министр биылғы көрменің бас тақырыбы ауыл шаруашылығын цифрландыру және аграрлық салаға жасанды интеллектіні енгізу екенін атап өтті.

— Цифрландыру — аграрлық сектордың тиімділігін арттырудың негізгі факторларының бірі. Бұл ауыл шаруашылығын дамытудың маңызды және перспективті бағыты, — деді ол.

25 елден әкелінген технологиялар

KazAgro/KazFarm-2025 көрмесіне Германия, Чехия, Аустрия, Беларусь, Иран, Ресей және Қытай секілді 25 елден 300-ден астам компания келді. Қатысушылар егіншілікке арналған дрондар мен өнімділікті бақылаудың цифрлық жүйелерінен бастап, робот техникасы мен интеллектуалды фермаларды басқару жүйелеріне дейінгі соңғы жетістіктерді ұсынды.

Фото: Дамира Кеңесбай/Kazinform

— Қазақстанның аграрлық болашағы жас инженерлердің, биотехнологтер мен бағдарламашылардың қолында. Біздің міндетіміз — аға буын мамандардың тәжірибесі мен жастардың энергиясын бір алаңда біріктіру, — деді ExpoGroup халықаралық көрме компаниясының директоры Шолпан Қожабаева.

Оның айтуынша, биылғы 300 компанияның 90-ы бұл көрмеге алғаш рет қатысып отыр. Олардың бәрі — саланың жетекші ойыншылары екен.

Халықаралық коммуникациялық алаң

Көрме Астанадағы EXPO халықаралық көрме орталығында өтіп жатыр. Ұйымдастырушылар атап өткендей, бұл шара аграрлық салада тәжірибе алмасушылар үшін ең ірі алаңға айналған. Шетелдік делегациялар, елшіліктер мен халықаралық ұйымдардың өкілдері қатысуы шараға халықаралық коммуникациялық платформа мәртебесін беріп тұр.

AgroHackathon және іскерлік бағдарлама

Фото: Виктор Федюнин/Kazinform

Іс-шара аясында салалық конференциялар, панельдік пікірталастар, семинарлар, сондай-ақ халықаралық сарапшылармен B2B және B2G форматта кездесулер өтеді.

Негізгі тақырыптар:

• аграрлық білім берудің жаңа тәсілдері;

• Чехия мен Германия тәжірибесіндегі инновациялар;

• климаттық өзгерістер жағдайындағы жем-шөп өндірісі;

• мал шаруашылығын цифрландыру және автоматтандыру;

• ветеринария және биологиялық қауіпсіздік мәселелері.

Биыл жас мамандарды жұмысқа тартуға ерекше көңіл бөлінді. Аграрлық жоғары оқу орындарының студенттері хакатонға қатысып, «ақылды» егіншілік, биотехнология және өнімділіктің цифрлық мониторингі саласындағы стартаптарды ұсынатын болады. Ал үздік идеялар нақты экономикаға енгізу үшін сарапшылар мен инвесторлардың қолдауына ие болады.

Жаңа экспорт

QazTrade сауда саясатын дамыту орталығы қазақстандық фермерлер шетелдік серіктестермен кездесіп, экспорттық келісімдер жасасатын мамандандырылған аймақ ұйымдастырды. Бұл «Қазақстанда жасалған» брендінің сыртқы нарықтардағы позициясын нығайтуға мүмкіндік береді.

Фото: Виктор Федюнин/Kazinform

Көрмелер тұқым, агрохимия және техникадан бастап генетика, жемшөп өндірісі мен өнімді қайта өңдеуге дейінгі агроөнеркәсіп өндірісінің бүкіл циклін қамтиды.

Бұған дейін, Қазақстанда жыл басынан бері ауыл шаруашылығы өнімдері 4,4% өскенін хабарлаған едік. 

Камила Мүлік