Елде цифрландыру ісі ілгерлейді

Отандық өнертапқыштар 1 млрд теңгенің ІТ өнімдерін экспорттады. Ал саладағы табыс 2 трлн теңгеге жетті.

Бұл жайында Жасанды интеллект және цифрлық даму министрі Жаслан Мәдиев мәлімдеді. Биыл бұл көрсеткіш көбеймесе, кемімейді. Себебі Қасым-Жомарт Тоқаев Қазақстанды цифрлық державаға айналдырып, жасанды сана ісін ілгерлетуді тапсырды. Президент пәрмені қалай орындалып жатыр? 

Қазақ басшысы жылқы жылын - Цифрландыру және жасанды интеллект жылы деп жариялады. Енді елде ІТ өнімдердің өндірісі өркен жайып, салаларды сандық жүйеге көшіру ісі ілгерлейді. Жауаптылар жыл бедерінде жасанды интеллекті қолдану аясын арттырады.

Түркістан газеті: Қасым-Жомарт Тоқаев, Қазақстан Республикасының Президенті

Қазақстан да экономика мен қоғамдық өмірге жасанды интеллектіні енгізуге басымдық беріп жатыр. Еліміздің бұл жұмысқа қатысты бастапқы мүмкіндіктері жаман емес. Мемлекет көрсететін қызметтерді, қаржы технологияларын, экономиканың бірқатар секторын цифрландыру ісінде нақты жетістіктеріміз бар. ІТ-стартаптарды қолдайтын толыққанды экожүйе тиімді жұмыс істеп тұр. Екі мың компанияның басын қосқан Astana Hub инновациялық кластері де бар.

Иә, отандық ІТ нарықтың алтын қазығына айналған Астана хаб алаңына 2 мың компания шоғырланған. Оның 25 пайызы шетелдіктер. Стартап жобалар аясында 30 мыңнан астам жұмыс орны ашылып, 900 млн доллар инвестиция тартылды. Ендігі меже - байырқарлы бастамалар аясын кеңейтіп, өнім көлемін ұлғайтады.

Олжас Бектенов, ҚР Премьер-министрі:

- Мемлекет басшысы 2026 жылды Цифрландыру және жасанды интеллект жылы деп жариялады. Біздің басты мақсатымыз – халықтың тұрмыс сапасын жақсарту үшін экономиканың барлық салаларына серпінді технологияларды енгізу. Жаңа цифрлық өнімдердің оң нәтижесін әр азамат сезінуге тиіс.

Сондай-ақ Қазақстан интернет тарату һәм тасымалдау әлеуетін арттыруға да бейілді. Әңгіме Каспий теңізінің түбіндегі оптикалық кабельдің құрылысы жайлы. Жауаптылар жобаны жыл соңына дейін аяқтауға ниетті.

Жаслан Мәдиев, ҚР Жасанды интеллект және цифрлық даму министрі:

- Қазақстан Еуропа мен Азия арасындағы стратегиялық мәртебеге ие және халықаралық интернет-трафик транзитінде маңызды рөл атқарады. Транзиттік әлеуетті арттыру мақсатында Каспий теңізінің түбінен Әзербайжан Республикасына дейін оптикалық кабель құрылысын іске асыру басталды. Жобаны 2026-шы жылдың 3 тоқсанында аяқтау жоспарда тұр.

Сондай-ақ билік 5G желісіннің аймақтардағы қамту аясын кеңейтуге де көңіл бөлмек. Екі жылдың еншісінде бесінші буынды байланыс қала аумағының 75 пайызында қолжетімді болады. Бұдан бөлек 40 мың шақырым автожолда жоғары жылдамдықты интернет тарту ісін жеделдетеді.

Авторы: Шернияз Жалғасбекұлы