Аида Балаева Юрий Аравиннің өмірден өтуіне байланысты көңіл айтты

Қазақ мәдениетінің көрнекті өкілі, композитор, музыкатанушы, профессор Юрий Петрович Аравин өмірден өтті. ҚР Мәдениет және ақпарат министрі Аида Балаева марқұмның отбасына, әріптестері мен шәкірттеріне қайғыра көңіл айтты, деп хабарлайды Egemen.kz.

Фото: Facebook/Ирэна Аравина

«Қазақ мәдениетінің көрнекті қайраткері, «Парасат» және «Отан» ордендерінің иегері, Қазақстан Республикасы Композиторлар одағының мүшесі, профессор Юрий Петрович Аравин өмірден озды. Қайраткер тұлғаның отбасы мен туған-туыстарына, шәкірттері мен әріптестеріне қайғыра көңіл айтамын», деді министр.

Аида Балаеваның айтуынша, Юрий Петровичтің есімі халқымыз үшін аса қадірлі. Ол қазақтың халық музыкасын кеңінен насихаттап, ұлттық мәдениетке зор үлес қосқан тұлға болған.

«Ұлттық мәдениетке бар жан-тәнімен берілген азамат ретінде фольклорлық мұраларды жинақтау мақсатында көптеген ғылыми-шығармашылық экспедицияларға бастамашы болды. Көптеген көне музыкалық туындыларды жаңғыртып, ғылыми жүйеге түсірді. Қазақ музыкасына, халық композиторлары мен ақындарының мұрасына арналған бірқатар телерадио бағдарламаларын жасады. Қазақ фольклорына шын жүрегімен ғашық, талантты музыкатанушы ретінде халқымыздың дәстүрлі музыкасының бай әлемін тыңдарманға жаңа қырынан танытты»,  деді министр.

Сондай-ақ ол Юрий Аравиннің тұтас бір шығармашылық буынды тәрбиелеген ұлағатты ұстаз болғанын атап өтті.

«Юрий Петрович өз өмірін өнер мен ұлт мәдениетіне арнады. Оның жарқын бейнесі мен руханиятымызға сіңірген еңбегі халық жадында мәңгі сақталады деп сенемін. Марқұмның жатқан жері жайлы, топырағы торқа болсын!»,  деді Аида Балаева.