Әйелдің “жоқ” дегені туралы ән Қазнетте дау тудырды: автор кешірім сұрады

Қазақстандық әнші Әділет Жауғашар әлеуметтік желіде сынға ұшыраған "Сүй, иә" әнін бұдан былай орындамайтынын мәлімдеді. Әртіс видеоүндеу жариялап, даулы жолдардың шығу төркінін түсіндірді және тыңдармандардан кешірім сұрады, деп хабарлайды Tengri Life.

Қызу талқыға қайырмадағы "Сұлудың жоқ дегені - иә" деген сөздер себеп болды. Желі қолданушылары мұндай тұжырым қыздың бас тартуын елемеу және оның еркінен тыс әрекеттерді ақтау ретінде қабылдануы мүмкін екенін атап өтті.

Әнші композиция төңірегіндегі жарияланымдар мен пікірлерді көргенін айтты. Оның сөзінше, ән жазылған кезде авторлар қазақ жазушысы Әзілхан Нұршайықовтың сөздеріне сүйенген, бірақ мұндай тіркеске көзқарас қаншалықты өзгергенін ескермеген.

"Біз "Сүй, иә" әнін жазғанда Әзілхан Нұршайықовтың сөздеріне сүйендік. Бірақ Әзілхан Нұршайықов өмір сүрген қоғам мен біз өмір сүріп жатқан қоғам екі бөлек болып шықты. Біз мұны байқамай қалдық және көптеген адамның сезіміне тиіп кетуіміз мүмкін деп ойламадық", - деді орындаушы.

Жауғашар зорлық-зомбылыққа, қатыгездік пен озбырлыққа қарсы екенін айтты.

"Мен де зорлық-зомбылық пен қатыгездікке қарсы жандардың бірімін. Мені әкем мен анам солай тәрбиеледі", - деді әнші.

Осыдан кейін әртіс бұл әнді бұдан былай орындаудан бас тартатынын мәлімдеді.

"Егер бұл ән сіздерге ұнамай, сезімдеріңізге тисе, мен оны енді орындамаймын деп шештім", - деді ол.

Instagram-дағы бұл жарияланымды көру

Adilet Zhaugashar (@adilet.zhaugashar) жариялаған жазба

Пікірлерде Әділет Жауғашарға бойкот жариялап, оның алдағы концертіне бармау туралы үндеудер айтылды. Орындаушы өмір бойы үлкен сахнада өнер көрсетуді армандағанын айтып, бүкіл концертке бір әнге қарап баға бермеуді сұрады.

"Мен өмір бойы осындай үлкен сахнада концерт беруді армандадым. Бірақ концерттің атауы "Сұлудың жоқ дегені - иә" емес. Бізде басқа да әндер бар", - деп атап өтті әртіс.

Сөз соңында Жауғашар тыңдармандардан тағы бір рет кешірім сұрады.

Бұған дейін Қазнетте Shoqansuits ерлер киімі брендіне қатысты дау туындаған болатын. Бұған бірнеше ай бұрын жарияланған, Бораттың бейнесі қолданылған видео себеп болды. Ролик ақпанда түсірілгеніне қарамастан, кейінгі күндері әлеуметтік желілерде қайта тарап, сын толқынын тудырды.

Google News арқылы жаңалықтарымызды қадағалаңыз