Айналымға кірген күні 1 доллар 4,75 теңге еді : Бүгін Ұлттық валюта күні

Бүгін – 15 қараша, Қазақстан Республикасында Ұлттық валюта – теңге күні.

Бұл күн 1997 жылы сол кездегі Президент Нұрсұлтан Назарбаевтың Жарлығымен ресми түрде бекітілген, – деп хабарлайды Aikyn.kz сайты.

Ұлттық валютаны «теңге» деп атау идеясын Халықаралық Инженерлер академиясының академигі, белгілі ғалым, КСРО Мемлекеттік сыйлығының иегері, «Құрмет» орденінің иегері Сауық Тәкежанов ұсынған.

Төл валютамыздың тарихы 1992 жылы басталды. Сол жылдың 27 тамызында Ұлттық банк теңге купюрасының үлгілерін бекітті. Келесі күні валютаның дизайнын дайындаған суретшілер – Тимур Сүлейменов, Меңдібай Алин, Ағымсалы Дүзелханов және Қайролла Әбжәлелов Англияға аттанып, алғашқы теңге үлгілері сол елде басып шығарылды. 1992 жылы теңге банкноттарындағы портреттер бекітілді.

1993 жылдың 12 қарашасында сол кездегі Президент Нұрсұлтан Назарбаев «Қазақстан Республикасында ұлттық валюта енгізу туралы» Жарлыққа қол қойды. Ал 15 қарашада теңге ресми түрде айналымға енді. Ескі ақшаны жаңа ұлттық валютаға айырбастау сол күні таңғы сағат 8:00-де басталып, 20 қарашада сағат 20:00-де аяқталды.

Бастапқыда 1 теңге 1000 рубльге бағаланғанымен, кейін бұл көрсеткіш 500 рубль болып бекітілді. Ал теңге алғаш айналымға енгенде, 1 АҚШ доллары 4,75 теңге болды.

1994 жылы қағаз тиындардың орнына жезден жасалған 2, 5, 10, 20 және 50 теңгелік монеталар шығарылды. 

2006 жылы 15 қарашада жаңа үлгідегі банкноттар айналымға енгізілді.

Ұлттық валюта күні еліміздің экономикалық егемендігі мен қаржы жүйесінің тұрақтылығының символына айналды.